Captain wa Arsenal Pierre-Emerick Aubameyang amaze iminsi agarukwaho nyuma yo kubura ku mukino wahuje Arsenal na Southampton mu mpera z'icyumweru gishize.
Uyu mugabo nk'uko byemejwe n'umutoza we Mikel Arteta, yazize kutubaha amabwiriza agenderwaho muri iyi kipe bivugwa ko yashyizweho n'umutoza.
Uyu musore bikomeje kuvugwa ko umubano we na Mikel Arteta utameze neza ko ndetse ashobora kuva muri Arsenal mu isoko ryo muri uku kwa mbere.
El Nacional iremeza ko rutahizamu Pierre-Emerick Aubameyang yaba yatangiye gutekereza kuba yajya mu ikipe ya FC Barcelona yo muri Espagne nayo ikeneye abakinnyi kuri ubu.
Guhagarikwa kwa Aubameyang byavuzwe ko byatewe n'uko yahawe uruhushya rwo kujya mu Bufaransa kureba Mama we ariko agatinda kugaruka akarenza igihe yahawe.
Ku mukino Arsenal yatsinzwemo na Everton ibitego 2-1 Aubameyang yari yabanje ku ntebe y'abasimbura kandi asanzwe abanza mu kibuga ariko habanzamo Alexander Lacazette.
Aubameyang w'imyaka 32 asigaje amezi 18 ku masezerano afite muri Arsenal akaba ashobora gusohoka muri iyi kipe bitameze neza.
Ikipe ya FC Barcelona ikeneye rutahizamu usimbura Sergio Aguero ugiye gusezera ruhago kubera ikibazo cy'indwara y'umutima.
Aubameyang ashobora kuva muri Arsenal mu kwa mbere(Image:Independent)
