Kuri uyu wa Mbere hari gukinwa imikino isoza umunsi wa kabiri mu mikino y'amatsinda, aho hatahiwe gukina amakipe umunani ari mu itsinda G n'itsinda H.
Ku isaha ya saa sita hatangiye umukino wo mu itsinda G aho Cameroon na Serbia zacakiraniye kuri sitade Al Janoub, ukaba ari umukino wasifuwe na Mohammed Abdulla Mohammed ukomoka muri Leta zunze ubumwe z'abarabu.
Aya makipe yombi yatsinzwe umukino ubanza ikipe yagombaga gutsindwa yari guhita isezererwa, bityo amakipe yombi yaje mu kibuga ishyaka riri hejuru cyane adashaka kurekura.
Cameroon yaje mu kibuga idafite umuzamu wayo Andre Onana bivugwa ko yagaragaje ibibazo by'imyitwarire. Iyi kipe kandi yafunguye amazamu ku munota wa 29 ku gitego cyatsinzwe na myugariro Jean-Charles Castelletto ku mupira yahawe na Nocolas N'Koulou.
Ubwo amakipe yombi yendaga kujya kuruhuka nibwo ikipe ya Serbia yishyuye icyo gitego ku munota wa 45 ku gitego cyatsinzwe na myugariro Strahinja Pavlovic wahawe umupira na Dusan Tadic.
Nyuma y'iminota ibiri gusa abanya-Serbia bahise batsinda igitego cya kabiri cyatsinzwe na Sergej Milinkovic-Savic wahawe umupira na Andrija Zivkovic, ubundi bajya kuruhuka Serbia iri imbere n'ibitego 2-1.
Bavuye kuruhuka Serbia yakomeje kwataka ngo ibone igitego gitanga umutekano maze Aleksandar Mitrovi aherezwa umupira na Andrija Zivkovic ku munota wa 53, niko gutsinda igitego cya gatatu maze benshi batekereza ko amanota atatu iyatsindiye.
Bidatinze nyuma y'iminota icumi gusa nibwo Vincent Aboubakar wari umaze kwinjira mu kibuga asimbuye, yahawe umupira na Jean-Charles Castelletto atsindira Cameroon igitego cya kabiri.
Mu gihe abanya-Serbia bari bakireba uko barinda izamu ryabo ngo ntibatsindwe igitego cya gatatu, Vincent Aboubakar ahereza Eric Maximin Choupo-Moting ku munota wa 66 atsindira Cameroon igitego cya gatatu banganya 3-3.
Ubu mu itsinda G Cameroon na Serbia ziranganya inota rimwe ku rindi, mu gihe imbere haza Brazil n'Ubusuwisi zifite amanota atatu zikaba ziranakina umukino wazo wa kabiri saa 18:00.
Imikino ya nyuma muri iri tsinda Cameroon izahura na Brazil, naho Serbia ihure n'Ubusuwisi. Mu gihe Cameroon itabasha gutsinda Brazil, nta kabuza izasezererwa itarenze amatsinda.
Serbia yari yizeye amanota atatu
Choupo-Moting yatsindiye Cameroon igitego kiyiha inota
