Uwari umunyamabanga muri Minisiteri ya Siporo yahagaritswe

Uwari umunyamabanga muri Minisiteri ya Siporo yahagaritswe

 Sep 17, 2022 - 05:50

Shema Maboko Didier wari umaze hafi imyaka itatu ari umunyamabanga uhoraho muri Minisiteri ya Siporo yamaze guhagarikwa.

Ibi byatangajwe binyuze mu itangazo ryashyizwe hanze ku mugoroba wo kuri uyu wa Gatanu, ryashyizweho umukono na Minisitiri w’Intebe, Dr. Edouard Ngirente mu izina rya Perezida wa Repubulika y’u Rwanda, Paul Kagame rivuga ko Shema Maboko yahagaritswe ku nshingano ze.

Iri tangazo riragira riti:"Hashingiwe ku biteganywa n’Itegeko Nshinga rya Repubulika y’u Rwanda ryo mu 2003 ryavuguruwe mu 2015, cyane mu ngingo yaryo ya 112. None ku wa 16 Nzeri 2022, Bwana Didier Shema Maboko, yahagaritswe ku mwanya n’Umunyamabanga Uhoraho muri Minisiteri ya Siporo (MINISPORTS)."

Ntabwo impamvu zo guhagarika Shema Maboko ku nshingano ze zatangajwe muri iri tangazo.

Itangazo ryo guhagarika Shema Maboko Didier

Mbere yo kuba umunyamabanga uhoraho muri Minisiteri ya Siporo, Shema Maboko yari asanzwe azwi cyane mu Rwanda mu mukino wa Basketball dore ko yari umusifuzi mpuzamahanga, akaba yaranabaye umuyobozi wa Tekiniki mu ishyirahamwe nyarwanda rya Basketball.

Shema Maboko Didier yari amaze imyaka isaga itatu kuri uyu mwanya kuko tariki 04 Ugushyingo 2019, aribwo yahawe izi nshingano, nyuma y'uko Minisiteri ya Siporo yari imaze gutandukana na Minisiteri y'Umuco.