Aitor Karanka wabaye umutoza wungirije muri Real Madrid kuva mu 2010 kugeza mu 2013, yatangaje ukuntu Cristiano Ronaldo yaryoherwaga cyane no guhangana na Lionel Messi wari muri FC Barcelona muri icyo gihe.
Kuri ubu aho Lionel Messi ari muri PSG yo mu Bufaransa na Cristiano Ronaldo akaba yarasubiye muri Manchester United, bisa nk'aho ihangana ryabo ryaragabanyije imbaraga cyane.
Gusa mu myaka ikenda Cristiano Ronaldo yamaze muri Real Madrid, we na Lionel Messi bahanganye ku buryo bukomeye ndetse banagabana ibihembo bitandukanye birimo Ballon d'Or eshanu kuri buri umwe n'ubwo Messi yatwaye izindi ebyiri nyuma.
Aganira n'ikinyamakuru The Mirror, Aitor Karanka wabaye umwungiriza ku bwa Jose Mourinho yagize ati:"Ubwo nari muri Real Madrid, ihangana rya Messi na Cristiano n'ubukeba bwa FC Barcelona na Real Madrid byatumye tuba beza nk'ikipe ndetse n'abantu ku giti cyabo.
"Buri mukino hagati y'aya makipe wabaga ari nk'ikizami kuri buri umwe.
"Ni byiza cyane kumubona n'ubu agikinira Manchester United nk'umuyobozi mwiza. Ashaka umupira akawukina nk'umwataka, ariko igihe ikipe iri mu bihe bikomeye aba ahari."
Muri iyi myaka Karanka yamaze muri Real Madrid, Cristiano Ronaldo yatsinzemo ibitego 168 afasha iyi kipe kwegukana igikombe cya shampiyona, ndetse mu myaka Ronaldo yamaze muri Espagne we cyangwa Messi umwe yegukanaga Ballon d'Or buri mwaka.
Karanka yakomeje avuga ukuntu umukino wa mbere bakinnye na FC Barcelona yabatsinze ibitego bitanu ku busa mu 2011, kandi akavuga ko intego ya Cristiano mbere y'umukino yabaga ari gukora neza cyane kurenza Lionel Messi.
Karanka ati:"Byaratubabaje cyane ariko byaradukanguye kandi twari tubikeneye.
"Twari twasinyishije abakinnyi bakiri bato nka Mesut Ozil, Sami Khedira - kandi ntabwo bari bafite ubunararibonye mu gihe aba Barcelona bari baramaze gutwara igikombe cy'isi.
"Ndibuka kubona Cristiano Ronaldo mbere y'umukino ukuntu yabaga yashyize umutima ku gutsinda ibitego no gutsinda imikino, kuba hejuru ya Lionel Messi. Iryo ryari ihangana ryatumye tuzamura urwego.
Cristiano Ronaldo yabaga arajwe ishinga no kuba mwiza kurusha Lionel Messi(Net-photo)
