Guverinoma ya Leta Zunze Ubumwe z'Amerika yasabye umutwe wa M23 guhagarika bwangu intambara bahanganyemo n'ingabo za Repubulika Iharanira Demokarasi ya Congo FARDC, ndetse isaba n'u Rwanda guharika ubufasha baha uyu mutwe
Mu itangazo ryo kuri uyu wa Gatandatu, Amerika yavuze ko u Rwanda rwahaye M23 misile zihanura indege, bityo zikaba ziri kwibasira abaturage, iby'izi misile kandi, yasabye na DR-Congo guhagarika kuzikoresha.
Umuvugizi wa Minisiteri y'Ububanyi n'Amahanga muri Amerika Matthew Miller, yagize ati " Dusabye M23 guhagarika imirwano aka kanya no kuva mu birindiro byayo biri mu nkengero za Sake na Goma nk'uko bijyanye na gahunda za Luanda na Nairobi."
Matthew Miller Umuvugizi wa Minisiteri y'Ububanyi n'Amahanga muri Amerika
Muri iri tangazo kandi, basabye Kinshasa guhagarika imikoranore na FDLR. Hagati aho, urujijo rukomeje kuba rwinshi ku warashe ku cyibuga cy'indege cya Goma, aho ku munsi w'ejo ibisasu byituye kuri iki kibuga hagambiriwe indege za gisirikare ariko hakaraswa iza gisivire bikozwe na dorone nk'uko Leta ya Congo ibivuga.
Ku mirongo y'urugamba, kuri uyu wa Gatandatu, impande zose zongeye gusakirana mu bice birimo: Mweso, Bashali na Mokoto muri Teritwari ya Masisi. Nubwo nta makuru menshi avuga kuri iyi mirwano, ariko impande zegamiye kuri Leta, zivuga ko FARDC hari ibice yigaruriye muri Sake, aho M23 yari imaze iminsi igenzura.
