Byari biteganyijwe ko u Rwanda ruzakira umukino ubanza wa Senegal mu itsinda L mu mikino yo gushaka itike yo kujya mu gikombe cy'Afurika kizabera muri Côte d'Ivoire, ukaba wari kuzabera kuri sitade mpuzamahanga ya Huye.
Nyuma yo kubona ko sitade ziri mu Rwanda zitujuje ibyangombwa ngo zakire iyi mikino, imirimo yo kuvugurura sitade mpuzamahanga ya Huye yatangiye muri Mata kuko byari byagaragaye ko ariyo idasaba byinshi ugereranyije n'izindi.
Sitade ya Huye iracyari kuvugururwa
Mu igenzura CAF yakoze ku byasabwaga ko sitade mpuzamahanga ya Huye ibashe kwakira iyi mikino, byagaragaye ko bidashoboka ko tari 7 Kamena iyi sitade yakwakira umukino wa Senegal.
Icyabayeho ni ibiganiro hagati ya FERWAFA n'ishyirahamwe ry'umupira muri Senegal bemeza ko Senegal izakira uyu mukino, naho u Rwanda rukazakira umukino wo kwishyura uzaba muri Nzeri.
Nk'uko bigaragara no mu itangazo rya FERWAFA byemejwe ko imikino ibanza yose mu itsinda L Amavubi azayikinira hanze(yakiriwe) mu gihe Sitade ya Huye ikiri kuvugururwa, naho u Rwanda rukazakira imikino itatu yose yo kwishyura.
Itabgazo FERWAFA yashyize ahagaragara
Imikino yose yo kwishyura u Rwanda narwo ruzayakirira murugo kuko umukino w'umunsi wa 4 bazakira Benin kuri sitade mpuzamahanga y'Akarere ka Huye biteganyijwe ko imirimo yo kuvugurura iyi sitade izaba yararangiye.
Kugeza ubu Amavubi akomeje imyiteguro aho baherereye muri Afurika y'epfo aho kuri uyu wa kane afitanye umukino na Mozambique nayo izakirira imikino yayo muri Afurika y'epfo.
