Umuhanzi Itahiwacu Bruce wubatse izina rya Bruce Melodie yatangaje byinshi byerekeye ubuzima bwe bite ubusanzwe adakunda gushyira hanze by’umwihariko ibijyanye n’uko aherutse gufungirwa mu Burundi, ibintu byamusize yishushanyijeho tattoo y’abana be babiri b'abakobwa yabayaranye n'umugore we Katarina.
Bruce Melodie mu kiganiro yagiranye na The Choice Live, yahishuye ko yishushanyijeho abakobwa be bitewe n’uko yatawe muri yombi ari mu gihugu cy’u Burundi.
Uyu muhanzi yagize ati “Ubwo najyaga hariya mu baturanyi [Burundi] nkafungirwayo, natekereje byinshi, nshaka abana bange, ndabakumbura, kubahamagara kuri [vudeo call] ntibibe bihagije.
Natekereje igisubizo kiramye kugirango njye mbabona kenshi, mpitamo kubishushanyaho ubwo nari narekuwe kugirango sinzongere kujya mbakumbura cyane ngo mbabure".
Uyu muhanzi yabajijwe impamvu yishushanyijeho abana be ariko umugore we Katarina ntawuramuca iryera.
Ati “Bariya bana kubishushanyaho, inkomoko yabo ni mama wabo, namwishushanyijeho ahandi.
Ngewe n’umugore wange dufite tattoo duhuje! Nge nawe twiyanditseho amatariki 27 Ukuboza 2009. Ni amatariki adasanzwe kuko nibwo njye nawe twatangiye urugendo rw’urukundo, ibintu byaje kubyara urukundo rurambye tukibaruka kabiri ndetse turimo kureba uko twakwibaruka undi mwana mu minsi iri imbere”.
Bruce Melodie yishushanyijeho tattoo z'abana be kubera kubakumbura by'ikirenga.
Bruce Melodie yavuze kuri album ya gospel yibwe bikarangira abafana bahejeje amaso mu kirere.
Ati “Hari igihe umuntu avuga ikinyoma, mu byukuri atari ikinyoma. Ahubwo uko iminsi ishira kikagenda kiba ikinyoma.
Nakoze album y’indirimbo zo kuramya no guhimbaza Imana [gospel album] irarangira.
Hanyuma mba aho mvuga ngo nzayisohora, hanyuma producer wayikoze arambwira ati “Aho album yawe aho yari iri [machine] barayibye”.
Mu by’ukuri ntabwo nari nsanzwe ndi mwiza mu ndirimbo ziramya zikanahimbaza Imana [gospel songs] ku buryo nakora izindi ndirimbo. Nahise ncika intege”.
Bruce Melodie yavuze ko yahise acika intege zo kongera gukora indirimbo zo kuramya no guhimbaza Imana kuko atariwo muhamagaro we.
Bruce Melodie yavuze ko yasohoye indirimbo ye “Akinyuma” agahitamo gukuraho telefoni bihurirana n’uko uwari kumubaza ibijyanye n’iriya ndirimbo [Bamporiki] atari mu nshingano ze [afunzwe].
Ati “Njya gusohora indirimbo nise “Akinyuma” ningewe ubwange wigiriye inama, ntawundi muntu nashakaga ko angira inama.
Nakuyeho telefoni kuko hari abantu b’inshuti zange bari kumpamagara kandi ntacyo narimfite cyo kubabwira”.
Bruce Melodie kandi yavuze ko n’ubwo atari ibintu yishimira, habuze umuhwitura nk’uko Bamporiki yajyaga abikora akiri mu nshingano ze.
Ati “Ntabwo yajyaga anyorohera, yakundaga kumbwira ati have, have, aha warengereye n’ibindi byo kunkebura kandi narabikundaga.
Dukeneye umuntu nk’uriya cyangwa bakamugarura mu mirimo ye igihe byaba bibaye ngombwa”.
Reba ikiganiro kirambuye Bruce Melodie yagiranye na The Choice Live. Kirimo aho yanenze Danny Vumbi wanditse indirimbo bikamunanira kubisoma ibyo yanditse, impamvu ashaka isoko ryo mu karere, ihangana rye na Christopher n'ibindi
