Kuri uyu wa 03 Mata 2023, nibwo inzego z'umutekano mu Burusiya zataye muri yombi umukobwa w'imyaka 26 y'amavuko Darya Trepova akekwaho guturitsa bombe mu mujyi wa St Petersburg.
Ku wa 02 Mata, nibwo umusirikare w'Umurusiya Vladlen Tatarsky yaturikijwe na Bombe mu mujyi wa St Petersburg, ibyatumye igihugu cyose gihinda umushyitsi.
Ku bw'ibyo, Guverinoma y'u Burusiya, yahise itangaza ko icyo ari igikorwa cy'iterabwoba, ndetse batangaza ko iperereza ryimbitse rigikomeje.
Darya Trepova watawe muri yombi ashinjwa gutera bombe i St Petersburg
Kuri iyo mpamvu, iki cyikaba ari igikorwa cya kabiri cy'iterabwoba cyibereye ku butaka bw'u Burusiya kuva iki gihugu cyatangiza ibitero bidasanzwe bya gisirikare muri Ukraine muri Gashyantare 2022.
Ku bw'ibyo, urupfu rwa Vladlen Tatarsky, rukaba ruje rukurukira urundi rupfu rw'umukobwa w'Umunyamakuru Darya Dugina, akaba yari umwana w'umufirosofe Aleksandr Dugin, inshuti yakadasoka ya Perezida Vladimir Putin.
Tugarutse ku gikorwa kiswe icy'iterabwoba, ikigo gishinzwe gukumira iterabwoba mu Burusiya Russia's National Anti-terrorism Committee (NAC), cyatangaje ko inzego z'ubutasi muri Ukraine arizo zateguye iki gitero zibifashijwemo na Alexei Navalny utavuga rumwe n'ubutegetsi bwa Kremlin nk'uko tubikesha ibiro ntaramakuru by'Abongereza Reuters.
Umusirikare w'Umurusiya Vladlen Tatarsky wivuganwe mu gitero cy'iterabwoba i st Petersburg
Nyamara ku ruhande rwa Ukraine, Umujyanama mu biro by'umukuru w'igihugu Mykhailo Podolyak, akaba yatangaje ko Ukraine ntaho ihuriye n'ibyabaye, ko ahubwo ari ibibazo bya Politike biri imbere mu Burusiya.
Mu gihe ibifaru biri gukocoranira muri Bakhmut ari nako u Burusiya bukomeza gusatira gucakira uyu mugi wose, intambara ya politike ivanzemo n'iterabwoba iri kubera mu Burusiya.
Nta kabuza mu minsi igiye kuza, u Burusiya bugiye kwihimura kuri iki gikorwa bise icy'iterabwoba nk'uko basanzwe babigenza iyo Ukraine yagabye igitero mu Burusiya.
