Manchester United iri gucungira hafi umusimbura wa Cristiano Ronaldo w'igihe kirekire

Manchester United iri gucungira hafi umusimbura wa Cristiano Ronaldo w'igihe kirekire

 Feb 10, 2022 - 05:07

Aba-scout ba Manchester United bari kureba neza rutahizamu wa Benfica umeze neza cyane witwa Darwin Nunez ngo barebe ko bamuzana mu Bwongereza.

Darwin Nunez yatsinze igitego kimwe mu bitego 3-1 ikipe ya Benfica yatsinze Tondela mu mukino wa shampiyona y'ikiciro cya mbere muri Portugal wabaye ku wa mbere.

Iki cyari igitego cya 21 uyu musore w'imyaka 22 yari atsinze mu mikino 26 amaze gukina muri uyu mwaka w'imikino ndetse bigatuma ariwe uyobora abamaze gutsinda ibitego byinshi muri shampiyona ya Portugal aho amaze gutsinda ibitego 16 muri shampiyona gusa.

Uyu musore kandi umaze gutanga imipira ibiri yavuyemo ibitego, ikipe ya Benfica yiteze kuzamukuramo agatubutse kuko yifuzwa n'amakipe atandukanye kandi akomeye muri ruhago y'isi.

Inkuru dukesha ikinyamakuru A Bola, ivuga ko ikipe ya Manchester United yaba yarohereje abantu kureba neza uyu rutahizamu w'umunya-Uruguay ukiri muto mu myaka ariko ugaragaza ko afite ibitego byinshi mu maguru ye.

Si iyi kipe yo mu mujyi wa Manchester gusa kandi kuko bivugwa ko n'amakipe nka Bayern Munich, AC Milan na Borussia Dortmund zaba zimuhanze amaso.

Ikipe ya Benfica iherutse kurekura Joao Ferix wagiye muri Atletico Madrid aguzwe miliyoni 113 z'amapawundi, ndetse na Ruben Diaz wagiye muri Manchester City aguzwe miliyoni 64 z'amapawundi. Darwin Nunez areberwa mu ishusho y'undi mukinnyi yaba iri kwitegura gutakaza ariko akaba yayisigira agatubutse.

Manchester United ishaka umusimbura wa Cristiano uri gukura(Net-photo)

Umunya-Uruguay Darwin Nunez yifuzwa n'amakipe menshi(Net-photo)