Kuri uyu wa kabiri tariki ya 07 Werurwe 2023, umutwe wa M23 watangaje ko uhagaritse imirwano n'ingabo za Congo FARDC nyuma y'igihe barwana.
M23 ihagaritse imirwano, nyuma y'ibiganiro by'amahoro uyu mutwe wagiranye na Perezida wa Anglo João Lourenço usanzwe ari umuhuza mu bibazo by'umutekano muri Congo.
M23 yarambitse intwaro hasi
Mu masezerano uyu mutwe wari wagiranye na Perezida Lourenço, bari bemeranyije ko bagomba guhagarika imirwano na FARDC bitarenze tariki ya 07 Werurwe 2023 i saa sita z'amanywa.
Mu itangazo ryasohowe na M23 mbere y'uko i saa sita zigera,ryagiraga riti " Mu rwego rwo kubahiriza ibyavuye mu biganiro na Perezida wa Anglola João Lourenço i Luanda, ndetse no mu rwego rwo kubahiriza ibiganiro binyuranye byabereye I Nairobi, Bujumbura ndetse na Addis Ababa byo kugarura amahoro mu Burasirazuba bwa Congo, M23 itangaje ko ihagaritse imirwano na FARDC kuri uyu wa kabiri tariki ya 07 Werurwe 2023, i saa sita z'amanywa."
#M23 - DÉCLARATION DE CESSEZ-LE-FEU EFFECTIF DU 07 MARS 2023
— M23RDCONGO (@M23_ARC) March 7, 2023
VERSION #FRANÇAISE & #ENGLISH pic.twitter.com/m1QM0I2Df4
Nubwo uyu mutwe watangaje ko wahagaritse imirwano, ariko wongeyeho ko ugomba kuguma mu duce bafashe kandi ko nibaramuka bagabweho ibitero bazitabara.
Bongeyeho ko bagomba kurinda abaturage, cyane ko mu minsi yashize Leta ya Congo yakunze kubakorera ihohoterwa.
M23 ikaba yatangaje ko yakoze ibi byose mu rwego rwo kwerekana ko ifite umuhate wo gukemura ibibazo bibarizwa muri Congo kandi bigakemuka mu mahoro.
Kugeza magingo aya ntacyo Guverinoma ya Congo iratangaza niba nayo yemera guhagarika imirwano .
Abasesenguzi benshi bakaba babona ntakabuza iyi ntambara irakomeza kuko M23 itaguma mu bice yafashe hanyuma Leta ya Congo ngo ibihorere.
