Kuri uyu wa 01 Gashyantare 2024, umutwe wa M23 watangaje ko washushubikanyije ingabo za Leta muri Teritwari ya Masisi nyuma yo kubagabo ibitero birangira bigaruriye ibice bigera kuri bitanu. Mu itangazo ryasohowe n'Ihuriro Alliance Fleuve Congo M23 ibarizwamo, bakaba ari bo bemeje aya makuru yo kwigarurira ibice bishya.
Ibice bavuga ko batsinzemo FARDC n'abambari babo, bikaba ari ibya: Rushonga, Majagi, Rwiririza, Kazinga na Kabushumba biherereye muri Teritwari ya Masisi. Lawrence Kanyuka umuvugizi wa M23 mu bya politike, muri iki gitondo yavuze ko ibitero bya Leta byakomeje ku birindiro byabo aho muri Masisi.
Mu itangazo uyu muvugizi yashyize kuri X, yavuze ko Ihuriro ry'ingabo za Guverinoma ya DR-Congo FARDC n'abandi barimo Wazalendo, Ingabo z'u Burundi n'iza SADC, bari kurasisha imbunda ziremeye mu bice bya Mweso, Mushaka, Karuba ndetse no mu nkengero zaho.
Uyu muvugizi yongeye kugaragaza ko ingabo za Leta zigamije kurimbura abaturage, ahamagarira imiryango mpuzamahanga kugira icyo babikoraho nubwo binumiye. Guhera muri Mutarama uyu mwaka, imirwano ikaba itari gukuraho mu bice byiganjemo Masisi.
