Rutahizamu w'umunya-Senegal Sadio Mane aherutse gutangaza ko yifuza kuva muri Liverpool yagezemo mu 2016, ndetse ikipe ya Bayern Munich niyo iyoboye amakipe yifuza uyu mugabo w'imyaka 30.
Inkuru dukesha ikinyamakuru The Mirror ivuga ko ku wa mbere aribwo Bayern Munich yagejeje ubusabe bwayo muri Liverpool, aho yifuza gutanga miliyoni 23.5 z'amapawundi zishobora kwiyongeraho 6.5 mu duhimbazamusyi(Bonus).
Liverpool yanze ubwo busabe bwa Bayern Munich dore ko babufashe nkaho Bayern iri kubakinisha, kuko ibyo bashyiriyeho utwo duhimbazamusyi bisa n'aho bidashoboka ko Mane yazabikora muri Bayern Munich.
Muri ubwo busabe bwa Bayern Munich harimo ingingo zigena igihe batanga utwo duhimbazamusyi muri Liverpool. Ni igihe Sadio Mane yaba yatwaye Ballon d'Or eshatu, Bayern Munich yatwaye shampiyona eshatu, ndetse igatwara n'igikombe cyo ku rwego rw'umugabane nka UEFA Champions league.
Liverpool ntishaka kurekura Mane kuri make(Net-photo)
Ubuyobozi bwa Liverpool burangajwe imbere na diregiteri mushya w'imikino ariwe Julian Ward, bwasubije Bayern Munich ko ikwiye kuza gushaka Sadio Mane yitwaje ari hejuru ya miliyoni 40 z'amapawundi.
Bivugwa ko hari andi makipe yifuza Sadio Mane arimo PSG na FC Barcelona, akaba akomeje gucungira hafi uko iby'uyu musore bikomeje kugenda.
Diregiteri w'imikino muri Bayern Munich ariwe Hasan Salihamidjic aherutse gutangaza ko yiteguye gukora urugendo akerekeza mu Bwongereza kuganira na Julian Ward ku igurishwa ry'uyu munya-Senegal.
Ku mpande zombi birazwi ko Sadio Mane ashaka kuva muri Liverpool muri iyi mpeshyi, ariko Liverpool nayo ishaka kumukuramo amafaranga ashyitse.
Mane aracyafite amasezerano y'umwaka umwe muri Liverpool, bivuze ngo yanze kumugurisha yazagendera ubuntu mu mpeshyi itaha. Ibi kandi ni ihurizo kuri Liverpool kuko n'amasezerano ya Mohamed Salah nibwo azaba agana ku musozo.
