Ku mugoroba wo kuri icyi cyumweru tariki 04 Nzeri 2022 mu karere ka Gasabo munzu y’ibirori ya Intare conference Arena habereye igitaramo cyiswe “Kwita Izina Gala Dinner” cyo kwizihiza igikorwa cyo kwita Izina abana b’ingagi ku nshuro ya 18.
Ni ibirori byitabiriwe n’umukuru w’igihugu na madamu we baherekejwe n’abarimo umunya Côte d'Ivoire, Didier Yves Tébily Drogba na Claire Akamanzi uhagarariye RDB. Ni umuhango wagaragayemo abarimo 20 bise amazina abana b’ingagi mu muhango wabereye mu ntara y’amajyaruguru mu karere ka Musanze kuwa 02 Nzeri 2022.
Iki gitaramo cyaririmbyemo abahanzi nyarwanda barimo Mike Kayihura na Ruti Joel. Usibye aba bahanzi nyarwanda, haririmbye abahanzi barimo umunya Senegal Youssou N'Dour, itsinda rya Sauti Sol ryo muri Kenya.
Umuhanzi Youssou N'Dour yaririmbye indirimbo ze zo hambere hanyuma itsinda rya Sauti Sol ryaje kumusanga ku rubyiniro baririmbana indirimbo ye yise “7 seconds”.
Iri tsinda ryahise riririmba indirimbo “Nerea” inumvikanamo Perezida Paul Kagame.
Mbere y’iki gitaramo, Perezida Kagame yari yakiriye mu biro bye Village Urugwiro, itsinda ry’abashoramari bo mu nzego zitandukanye zirimo urwego rw’ishoramari, itangazamakuru, ubuzima n’ubuvuzi, baganira ku mahirwe y'ishoramari ari mu Rwanda.
Mbere yaho kandi Perezida Kagame ari kumwe na Madamu Jeannette Kagame, bifatanyije n'abatuye Umujyi wa Kigali muri siporo rusange.
Perezida Paul Kagame na madamu we bitabiriye igitaramo cyatumiwemo abahanzi barimo Youssou N'Dour, Sauti Sol n'abandi.
View this post on Instagram
