Mu itangazo ryashyizwe hanze n'abategura ibyo bihembo, harimo ko abatora bose basabwa kureba buri filime yatowe mu byiciro bitandukanye mbere yo gutora.
Nk’uko NBCDFW ibivuga, ayo mabwiriza agamije kuzamura ubutabera n’uburinganire mu nzira yo gutora, kubera ko bamwe mu batoye bemeye ko birengagije filime zimwe na zimwe bagatora bashingiye ku gukundwa kw’umuhanzi na filime aho gutora bashingiye ku buziranenge n'ubwiza bwayo.
Usibye itegeko rishya ryerekeye kureba filime mbere yo gutora, abategura Oscars banasobanuye neza ko filime zakozwe hifashishijwe ubwenge buhangano (AI) zishobora gutwara igihembo cya mbere muri ibyo bihembo.
Ibirori bitaha byo gutanga ibihembo bya Oscars ku nshuro ya 98 biteganyijwe ku Cyumweru, tariki ya 15 Werurwe 2026 kuri Dolby Theatre, Hollywood, Los Angeles, aho umunyarwenya Conan O'Brien ari we uzongera kuyobora umwaka wa kabiri yikurikiranya.
