Chidimma Adetshina wahataniye ikamba rya Nyampinga wa Afurika y'Epfo ariko akaza kwikura mu marushwa bigeze hagati, yavuze ko adateganya kuba yasubira muri iki gihugu cyamwihakanye.
Chidimma akaba yarikuye muri Miss South Africa nyuma y'uko yashinjwe ko adafite ubwenegihugu bwa Afurika y'Epfo, ibintu byaje kuzamura umwuka mubi hirya no hino ku mbuga nkoranyambaga.
Minisiteri y'Ubutegetsi bw'Igihugu muri Afurika y'Epfo yatangaje ko uyu mukobwa afite umubyeyi wo muri Nigeria n'undi wo muri Mozambique, banarenzaho ko nyina yafashe indangamuntu ya Afurika y'Epfo mu buryo bw'amanyanga.
Izi mpamvu zose, ziri muzatumye atangaza ko yikuye muri ayo marushanwa kubera impamvu z'umutekano we n'iz'umuryango we.
Icyakora, abategura amarushanwa na Miss Universe Nigeria, bahise bamutumira kuza guhatana, ari naho ari magingo aya.
Ubwo yari mu kiganiro kuri Radiyo Cool FM y'aho muri Nigeria, yatangaje ko yifuza kuguma muri Nigeria, ndetse ko adatekereza kuba yasubira muri Afurika y'Epfo.
Yashimangiye ko Nigeria ari ubutaka bw'abakurambere, bityo ko yifuza kuhaguma igihe kirekire cyane ko yemeza ko atekanye, akavuga ko ibyo gusubira i Pretoria azaba yongera kubitekerezaho ikindi gihe kitari iki.
