Mikel Arteta yavuze ko byamushimisha cyane Arsene Wenger wahoze atoza Arsenal agarutse muri iyi kipe ngo kuko yafasha byinshi.
Arteta arifuza ko Wenger amuba hafi(Image:Daily express)
Arsene Wenger ntaragaruka mu ikipe ya Arsenal kuva yayivamo mu 2018 ubwo yari amaze imyaka 22 ayitoza. Gusa hashize iminsi bivugwa ko ashobora guhabwa inshingano muri iyi kipe.
Umutoza wa Arsenal witwa Mikel Arteta wanatojwe na Arsene Wenger muri Arsenal, atangaza ko aherutse kuganira n'uyu musaza w'imyaka 71 amusaba kugaruka hafi y'ikipe.
Arsene Wenger na Mikel Arteta(Image:Daily mail)
Mu kiganiro n'itangazamakuru Mikel Arteta yagize ati:"Ndizera ko dushobora kumwiyegereza cyane kuko ndatekereza ko yagira ibihe byiza kandi akongera umwuka mwiza mu ikipe kubera icyubahiro, urukundo no kwishimirwa buri wese muri iyi kipe amufitiye kubera ibyo yakoze."
Arsene Wenger yatwaye ibikombe bitatu bya shampiyona n'ibikombe birindwi bya FA ndetse niwe mutoza watoje iyi kipe igihe kirekire dore ko ari nawe wakozemo ibihambaye.
Ariko uyu mugabo iminsi ye ya nyuma muri Arsenal ntiyari myiza kuko abafana bamuhatiraga kuva muri iyi kipe yari itangiye kubura mu makipe akina Champions League.
Wenger niwe wazanye sporting director wa Arsenal witwa Edu Gaspar ndetse azana n'ushinzwe abato ba Arsenal ariwe Per Mertesacker yanatoje.Wenger rero akomeje kuvugwa ko byibuze yagirwa ambasaderi wa Arsenal n'ubwo Arteta atatangaje imirimo Wenger yahabwa.
Abajijwe ku nshingano Wenger yahabwa muri Arsenal, Arteta yasubije ati:"Sinabibabwira ubu,ariko icyo navuga nuko nabyishimira aramutse ari hafi yange kuko nizera ko yamfasha byinshi."
Mu ntangiro z'uyu mwaka Arsene Wenger yatangaje ko imiryango ifunguye kuri Arsenal ku nama zose Arteta yakenera.
Arsene Wenger ubu akora muri FIFA(Net-photo)
Arsene Wenger ubu akora muri FIFA nk'ushinzwe iterambere ry'umupira w'amaguru ndetse ayoboye igitekerezo cyo guhindura uko umwaka w'imikino ugenda harimo no gukina igikombe cy'isi buri myaka ibiri.
Amakuru rero akomeza kuva i London avuga ko uyu munyabigwi wa Arsenal bishobora kurangira yitabajwe akaba hafi y'ikipe kurenza uko bimeze ubu.
