Perezida wa Leta Zunze Ubumwe z'Amerika Joe Biden yavuze ko mu Cyumweru gitaha Israel na Hamas bashobora kugera ku bwumvikane bwo guharika imirwano mu gihe kirambye. Aya akaba ari amasezerano ari gukorwa ku buhuza bwa Qatar hamwe na USA.
Intumwa za Israel ku munsi w'ejo nibwo zageze muri Qatar kugira ngo amasezerano ashyirweho umukono. Ku rundi ruhande, umutwe wa Hamas urasaba ko Israel yahagarika imirwano mu gihe cy'iminsi 40 Aba-Islam bazamara mu gihe cy'igisibo cya Ramadan biteganyijwe cyatangira ku wa 10 Werurwe kugera ku wa 09 Mata 2024.
Perezida Biden yizeye ko mu Cyumweru gitaha Israel na Hamas bazagera ku bwumvikane
Mu bindi Hamas isaba ko byakubahirizwa, harimo kureka amakanyo y'imfashanyo agera kuri 500 akinjira muri Gaza Strip, ndetse Israel ikarekera kurasa ku bitaro bitandukanye. Ni mu gihe uyu mutwe uvuga ko nawo warekura abantu 19 mu bo washimuse, Israel igahita irekura 400 mubo ifunze.
Mu gihe ibiganiro by'amahoro birimbanyije, intambara yatangiye tariki ya 07 Ukwakira 2023 irakomeje muri Gaza, aho abantu batatu bishwe na Israel muri West Bank, ari ko no mu bindi bice imirwano idahagarara Israel yibasira cyane ibikorwaremezo birimo amashuri n'insengero.
Kugera tariki ya 18 Gashyantare 2024, imibare yerekanaga ko abantu barenga 30,000 bamaze kwicwa, barimo 28,473 bo muri Palestine, n'abandi 1,410 bo muri Israel. Abanyamakuru 88 barishwe barimo 86 bo muri Palestine ndetse na 2 bo muri Israel.
Joe Biden akomeje gushyira ku gitutu Benjamin Netanyahu ngo yemera gusoza intambara kuri Gaza
