Jurgen Klopp utoza Liverpool ashyigikiye Mohamed Salah na Sadio Mane basanzwe bakinira Liverpool bakaza guhangana kuri iki cyumweru, n'ubwo abizi ko haratsinda umwe gusa mu gihe undi aratsindwa.
Aba ba rutahizamu babiri ba Liverpool baraza gutana mu mitwe ku mukino wa nyuma w'igikombe cy'Afurika uraza kubera kuri stade Oleme iherereye mu mujyi wa Yaounde muri Cameroon ku isaha ya saa 21:00 ku isaha z'i Kigali.
Jurgen Klopp arabizi neza ko umwe araza kwishima mu gihe undi araba yasazwe n'agahinda ko gutsindwa, kandi aba bombi abakeneye mu mukino afitanye na Leicester City ku wa kane gusa aranateganya ko bashobora no guhabwa akaruhuko.
Klopp yagize ati:"Aba bahungu babiri ni indwanyi nyazo. Bariteguye, ntabwo bafite ubwoba bw'ibiruhuko. Ntawe nigeze numva abinsaba.
"Ubwo rero hamwe n'aba bahungu babiri ibintu biroroshye. Ndabizi ko bashaka guhita bakina ariko hamwe nabo tuzareba niba bikwiye.
"Ushobora gutekereza ko bose bashaka gukina umukino wa Leicester City, ngo batsinde ibitego banatsinde umukino ku bwa Liverpool."
Jurgen Klopp yongeyeho ati:"Salah na Mane bose bagize igikombe cy'Afurika cyiza, ariko hatsinda umwe abasigaye bose bagatsindwa. Iyo niyo Si twaremeye bariya bahungu. Urakoze kubibaza, kuko ntawe ujya abaza uko babasha kubana nabyo.
"Ariko nabikora nta kibazo. Nzabafasha uko mbishoboye. Nibagaruka tuzaganira turebe ko hari icyo bakeneye.
"Niba bakeneye akaruhuko, ni abahungu bacu, tuzakora buri kimwe mu rwego rwo kubafasha mu bishoboka byose."
Mohamed Salah yageze muri Liverpool mu 2017 aguzwe miriyoni 36.5 z'amapawundi ubwo yari avuye mu ikipe ya AS Roma. Salah yasanze Sadio Mane muri Liverpool wari umazemo umwaka, dore ko yari yaguzwe miriyoni 34 ava muri Southampton. Aba basore bombi bamaze gutsindira Liverpool ibitego 255 ndetse banatwaramo ibikombe bitandukanye birimo Champions league na shampiyona.
Jurgen Klopp ashyigikiye abahungu be baza kuba bahanganye(Image:Sky sports)
Salah na Mane basanzwe bakinana barahangana iri joro(Net-photo)
