Umukinnyi wa Manchester City yavuze ikipe abona izababiza icyuya muri Premier league

Umukinnyi wa Manchester City yavuze ikipe abona izababiza icyuya muri Premier league

 Sep 22, 2022 - 18:58

Rodri ukina mu kibuga hagati yatangaje ikipe abona izahatana na Manchester City ku gikombe cya shampiyona muri uyu mwaka w'imikino.

Uyu munya-Esipanye ukina hagati mu kibuga yigarira yatangaje ko abona ikipe ya Tottenham ariyo izahangana na Manchester City ku gikombe cya shampiyona cy'uyu mwaka.

Ikipe ya Tottenham ntirigera itwara Premier league, dore ko igikombe iheruka yagitwaye mu 1961.

Gusa ibi ntibibuza Rodri kubona iyi kipe nk'izatanga ihangana rikomeye cyane muri uyu mwaka bitewe n'umutoza Antonio Conte, ndetse no kugira ikipe ikomeye.

Aganira na Gazzetta dello Sport, Rodri yagize ati:"Bashyize hamwe abakinnyi bakomeye kandi bafite umutoza ufite intumbero zigaragara, ndetse uzi uburyo yabakoresha neza.

"Bazi icyo bakwiye gukora kandi bagikorana kudahusha. Ndabona Tottenham nk'umukandida ku gikombe. Amateka ya Conte arivugira yo ubwayo."

Rodri abona ikipe ye izahangana na Tottenham (Image:Alamy)

Mu kuvuga amateka ya Antonio Conte ntabwo Rodri yigeze yibeshya kuko uyu mugabo yatwaye ibikombe bya shampiyona muri Juventus na Inter Milan, ndetse aza no muri Chelsea atwara Premier league.

Muri uyu mwaka w'imikino Tottrnham ntabwo iratsindwa n'umukino umwe, ndetse iyi kipe irarushwa inota rimwe na Arsenal iri ku mwanya wa mbere kuko ifite amanota 17 mu gihe Arsenal ifite 18.

Muri uyu mwaka w'imikino Conte yakomeje ikipe ye yongeramo abakinnyi bitezweho kuzamufasha cyane barimo Richarlison, Yves Bissouma, Ivan Perisic na Djed Spence.

Ikipe ya Manchester City nayo ntabwo iratsindwa n'ubwo yatakaje amanota kuri Aston Villa na Newcastle, ariko nayo inganya amanota 17 na Tottenham.

Nyuma y'ibiruhuko by'amakipe y'ibihugu, ikipe ya Tottenham izahita ihura na Arsenal, bityo birashoboka ko yafata umwanya wa mbere mu gihe yaba itsinze uwo mukino.

Antonio Conte yubatse ikipe ye(Image:Reuters)