Kuri uyu wa Kabiri nibwo ikipe y'igihugu ya Senegal yakinnye umukino wa nyuma mu itsinda A aho yabashije gutsinda Ecuador, igahita inerekeza muri kimwe cya munani aho izakina n'Ubwongereza.
Gusa nyuma y'iyi ntsinzi hatangiye gusohoka amakuru ko iyi kipe ishobora kuba yahanwa ku bwo kutubahiriza amabwiriza ya FIFA yagennye agenga imikino y'Igikombe cy'isi.
Senegal yamaze kubona umwanya muri kimwe cya munani
Amategeko avuga ko mbere y'umunsi umwe ngo umukino ube, umutoza mukuru ajya mu kiganiro n'itangazamakuru ndetse akajyana n'umwe mu bakinnyi be akenshi ukunze kuba ari kapiteni w'ikipe n'ubwo yemerewe kujyana uwo ashaka.
Mu biganiro n'itangazamakuru Aliou Cissé yakoze mbere y'imikino ibiri ya mbere, hamwe yahyanye na Kalidou Koulibaly ahandi ajyana na Krepin Diatta.
Gusa mu kiganiro n'itangazamakuru Aliou Cissé yakoze mbere y'umukino wa Ecuador, uyu mugabo yagiye imbere y'itangazamakuru ari wenyine kandi amabwiriza ya FIFA ntabyemera.
Amagambo FIFA yatangaje agira ati:"Akanama gashinzwe imyitwarire ka FIFA katangiye kwiga ku ishyirahamwe ry'umupira w'amaguru rya Senegal ku kijyanye no kuba hatarubahirijwe ingingo ya 44 y'amabwiriza y'Igikombe cy'isi cya 2022 kiri kubera muri Qatar.
"Amabwirizwa yishwe arebana n'ibyagombaga gukorwa mu kiganiro n'itangazamakuru cyabaye tariki 28 Ugushyingo 2022 gitegura umukino w'Igikombe cy'isi wahuje Ecuador na Senegal."
Byitezwe ko ikipe y'igihugu ya Senegal ishobora kuza gucibwa amande ku bw'aya mabwiriza yishwe, dore ko n'Ubudage bwaciwe ibihumbi 8,800 by'amapawundi kubera gukora nk'ibyo Senegal yakoze mbere y'umukino yanganyijemo na Esipanye.
Hansi Filick utoza Ubudage we yisobanuye avuga ko impamvu atazanye umukinnyi mu kiganiro n'itangazamakuru aruko abakinnyi bari mu majyaruguru ya Qatar, akaba atarashakaga gukoresha umukinnyi urugendo rw'amasaha atatu barimo bitegura umukino wa Esipanye.
Aya mande yaciwe Ubudage niyo mafaranga menshi FIFA yateganyije y'ibihano muri iki gikombe cy'isi, bivuze ko ayo abadage baciwe ariyo menshi ashoboka Senegal nayo ishobora gucibwa.
Senegal ishobora kuza gucibwa amande
