Umutariyani Carlo Ancelotti utoza Real Madrid akomeje gusunika ngo arebe ko iyi kipe yasinyisha rutahizamu w'umunya-Brazil Gabriel Jesus byitezwe ko azasohoka muri Manchester City.
Umwaka w'imikino wa Ancelotti wagenze neza afasha Real Madrid kwegukana La liga ya 35, ndetse banatwara UEFA Champions league ya 14 batwinze Liverpool. Gusa iyi kipe byarangiye ibuze Kylian Mbappe wongereye amasezerano muri PSG, kandi byari byitezwe ko azayerekezamo.
Nyuma yo kubura Mbappe, Real Madrid ikomeje gushaka rutahizamu wundi yasinyisha, ndetse ikaba yerekeje amaso kuri Gabriel Jesus wifuzwa cyane na Arsenal.
Ubwo Gabriel Jesus yerekezaga muri Manchester City mu 2017, yifuzwaga n'amakipe akomeye arimo Real Madrid ndetse na Bayern Munich yatozwaga na Carlo Ancelotti uri muri Real Madrid ubu.
Real Madrid irifuza Gabriel Jesus(Image:Getty)
Gabriel Jesus ugiye kwinjira mu mwaka wa nyuma w'amasezerano ye ashobora kugurishwa na Manchester City, dore ko iyi kipe yamaze gusinyisha ba rutahizamu babiri aribo Erling Haaland na Julian Alvarez.
Jesus w'imyaka 25 yabanje mu kibuga imikino 21 yonyine muri uyu mwaka w'imikino ushize, ibi bikaba bituma ashaka ikipe yamuha umwanya uhagihe wo gukina.
Kwerekeza mu ikipe ya Real Madrid yaba asanzeyo abandi banya-Brazil aribo Vinicius Junior, Rodrygo ndetse na myugariro Eder Militao bahurira mu ikipe y'igihugu.
Aya ni amakuru atari meza habe na mba ku ikipe ya Arsenal yifuza rutahizamu ku buryo bukomeye cyane. Arsenal iherutse gutakaza Pierre-Emerick Aubameyang na Alexandre Lacazette muri uyu mwaka w'imikino ushize irifuza cyane uyu munya-Brazil.
Gabriel Jesus yinjiye muri Manchester City mu 2017 ubwo yari avuye mu ikipe ya Palmeiras y'iwabo muri Brazil. Uyu musore yatsinze ibitego 95 mu mikino 236 yakiniye iyi kipe yo mu Bwongereza.
