Ni Gasogi ya Rugaju Reagan cyangwa ni Kiyovu ya Rugangura Axel?

Ni Gasogi ya Rugaju Reagan cyangwa ni Kiyovu ya Rugangura Axel?

 Apr 15, 2022 - 06:48

Umukino wa shampiyona y'ikiciro cya mbere mu Rwanda urahuza Gasogi United na Kiyovu Sports ukomeje kuvugisha benshi kugeza n'aho abanyamakuru bakomeye mu Rwanda bashyizeho intego kuri uyu mukino.

Ni umukino uraba kuri uyu wa Gatanu ku isaha ya saa 15:30 ukaba urabera kuri stade ya Kigali i Nyamirambo, aho Gasogi United iraba yakiriye Kiyovu Sports iyoboye urutonde rw'agateganyo rwa shampiyona y'u Rwanda.

KNC uyobora Gasogi United amaze iminsi yumvikanisha ukuntu uyu mukino bawiteguye ku buryo budasanzwe, ndetse no ku munsi w'ejo mu kiganiro n'itangazamakuru yongeye kubigarukaho avuga ko atari umukino gusa ahubwo ari ibirori.

KNC yagize ati:"Twebwe icyo twavuga ni uko ku munsi wejo tuzafata Siporo tukayivana mu kantu kameze nk'iminota 90 tukayishyira ku rundi rwego, buriya iminota 90 ni micye cyane harimo abaza batari hamwe bakarinda bagenda batari hamwe, none turashaka kumenya ni gute twagenzura uko kutaba hamwe mu mutwe kw'abafana?

"Ku bw'izo mpamvu abantu bakunda kuza ku mukino bashonje abandi bagatinda ngo bategeje ibiryo cyangwa se bagiye kubishaka. Icyo rero nagicyemuye ejo kuva mbere y'umukino ibyo kurya bizaba bihari by'amako yose. Turashaka ko umukino uzajya gutangira ari ibirori bishyigikira ibindi birori kuko abantu bazaba banyweye kandi banariye."

KNC avuga ko iki aricyo gihe cyo gutsinda Kiyovu Sports

KNC wumvikanye mu minsi ishize avuga ko Kiyovu Sports bazayicucumira mu kibuga, yongeye kugaruka ati:"Sinzi niba uyu mukino FERWAFA iwufata nk'uko natwe tuwufata. Sinizere ko nzabona Umusifuzi aza gutoba umukino wacu, kuko azaba ababaje.

"Niba hari igihe gikomeye mu buzima bwacu, noneho bwanjye nka Perezida wa Gasogi, bwo kubabaza Kiyovu Sports na Perezida wayo ni iki gihe. Twakoze ubushakashatsi dusanga ikipe tutabanye neza ari Kiyovu kuko muri uyu mwaka w’imikino imaze kuturega inshuro enye, inadusabira ibihano bitari iby’aba-sportifs."

Aya magambo yose ya KNC yagiye avuga byongeyeho Gasogi United ikaba yaragiye yitwara neza cyane imbere ya Kiyovu Sports nibyo byatumye uba umukino uteye amatsiko kuri benshi, ndetse hakaba n'abatawuvugaho rumwe nk'uko byagenze ku banyamakuru babiri ba Radio Rwanda aribo Rugangura Axel na Rugaju Reagan.

Mu kiganiro Urubuga rw'imikino cyakozwe mbere y'uko twinjira mu cyumweru cyo kwibuka nibwo Rugangura Axel yemezaga ko Kiyovu Sports izatsinda uyu mukino, mu gihe Rugaju Reagan yavugaga ko Gasogi United izakora akantu, birangira aba bombi bumvikanye ko uzatsindwa azatanga amadorari ijana.

Mu kiganiro cy'uyu munsi kandi cyari cyiyobowe na Kwizigira jean Claude nk'uko byari ubwo bashyiragaho iyo ntego, aba bombi haba Rugangura na Reagan bagarutse bavuga ko ntawahinduye uruhande, igitegerejwe akaba ari ibirava mu mukino.

Usibye abashinja KNC gushyushya umukino bavuga ko Kiyovu Sports iri hejuru cyane, imibare igaragaza ko Gasogi United itajya yorohera Kiyovu Sports kuva yatangira gukina mu kiciro cya mbere mu 2019. Mu mikino itandatu imaze guhuza Gasogi United na Kiyovu Sports, aya makipe yanganyije imikino ibiri, Kiyovu itsinda umwe, mu gihe Gasogi yatsinze imikino itatu.

Dore uko iyo mikino yarangiye:

31/10/2019: Gasogi 1-1 Kiyovu 

3/3/2020: Kiyovu 0-1 Gasogi 

8/5/2021: Gasogi 2-1 Kiyovu 

11/5/2021: Kiyovu 4-1 Gasogi 

28/6/2021: Gasogi 1-0 Kiyovu 

12/12/2021: Kiyovu 1-1 Gasogi