Kuri uyu Gatandatu tariki 27 Mutarama 2024, imirwano y'akasamutwe iramukiye mu burasirazuba bwa Repubulika Iharanira Demokarasi ya Congo hagati y'ingabo z'iki gihugu FARDC n'abandi bafatanya, aho bari gutana mu mitwe n'umutwe wa M23.
Mu itangazo ryasohowe muri iki gitondo n'umuvugizi wa M23 Lawrence Kanyuka, yatangaje ko ihuriro ry'Ingabo za Guverinoma ya DR-Congo FARDC ndetse n'indi mitwe bafatanya irimo, FDLR, Abacanshuro, ingabo z'u Burundi ndetse n'ingabo za SADC, ko babyutse babarasaho mu bice bitandukanye.
Muri iri tangazo, M23 ivuga ko ibirindiro byatewe biherereye mu duce twa Karuba, Kingi, Karenga, Negenero, Mbuhi ndetse n'ibindi bice bihakikije. Kuri Kanyuka, avuga ko ibi bitero bigamije kongera kwica abaturage nk'uko baheruka kubigenza muri Teritwari ya Masisi.
Imirwano yo kuri uyu wa Gatandatu, ije ikurikira indi yari imaze iminsi ibera mu gace ka Mweso, aho urugamba rwari ijyanamuntu.
Mu butumwa bwo kuri X, Lawrence Kanyuka yashimangiye ko M23 iri gusubiza cyinyamwuga ibitero bya FARDC kandi ko batazihanganira ibikorwa by'ingabo za Repubulika Iharanira Demokarasi byo kwica abaturage mu bice bigaruriye.
