Kiss Summer Awards 2021! Indirimbo zihatanye mu kicyiro cy’iyakunzwe mu mpeshyi zashyizwe hanze   

Kiss Summer Awards 2021! Indirimbo zihatanye mu kicyiro cy’iyakunzwe mu mpeshyi zashyizwe hanze  

 Aug 26, 2021 - 09:19

Ibihembo bya The Kiss Summer Awards byagarutse ku nshuro ya Kane . Uyu munsi nibwo ubuyobozi bwa Radio KISS Fm bwasohoye urutonde rw’indirimbo ziri guhatana mu cyiciro cy’indirimbo yahize izindi mu gihe cy’impeshyi. Izi ndirimbo zigomba kuba zarasohotse hagati ya gicurasi na Kanama muri uyu mwaka wa 2021.

 

Muri iki kiciro hajyiye guhatana indirimbo eshanu zirimo Amata ya Dj Phil Peter Afatanyije na Social Mula , Katapilla ya Bruce Melodie , Away ya Ariel Wayz afatanyije na Juno Kizigenza, My Vow ya Meddy na Igikwe ya Gabiro Guitar afatanyije na Confy.

 

Ibi bihembo bitangwa mu gihe cy’impeshyi mu byiciro bitandukanye harimo Umuhanzi wahize abandi mu gihe cy’impeshyi , indirimbo yahize izindi mu gihe cy’impeshyi , Ukora Audio (Producer) wahize abandi mu gihe cy’impeshyi n’icyiciro cy’umuhanzi mushya mu gihe cy’impeshyi.

 

Byatangiye Ryari?

 Mu 2018 nibwo bwa mbere ibi bihembo byatangiye gutangwa mu Rwanda uwo mwaka bihera ku byiciro bitatu harimo icy’umuhanzi wahize abandi mu mpeshyi yose, utunganya Audio (Producer) wahize abandi mu mpeshyi ndetse n’umuhanzi wahize abandi mu gihe cy’impeshyi yose.

 Bruce Melodie , Charly&Nina , Riderman , The Ben na Yvan Buravan nibo bahatanaga mu kiciro cy’umuhanzi mwiza muri iyo mpeshyi yose . ni mu gihe Ntakibazo ya Urban Boyz bafatanyije na Bruce Melodie na Riderman , Bape ya Active bafatanyije na Dj Marnaud , Garagaza ya Yvan Buravan , Lose Control ya Meddy afatanyije na The Ben na 1 Million C’est Quoi ya peace Jolis nizo zahatanaga mu kiciro cy’indirimbo y’impeshyi , naho Pastor p , Madebeat , Hollybeat ,Davydenko na Bob Pro nibo bahataniraga igihembo cy’utunganya indirimbo (best audio producer) mwiza mu mpeshyi yose.

 

The Ben niwe wegukanye iki gihembo  mu cyiciro cy’umuhanzi w’impeshyi , Bob Pro yegukanye iki gihembo mu cyiciro cy’utunganya indirimbo z’amajwi wahize abandi muri icyo cyiciro. Ntakibazo ya Urban Boys bafatanyije na Bruce Melodie na Riderman niyo yegukanye igihembo cy’indirimbo nziza y’impeshyi. Umwaka wakurikyeho wa 2019 naho ibihembo byakomeje gutangwa uretse ko hongewemo icyiciro  cy’umuhanzi mushya w’impeshyi yose.

Umuhango wo gutangaza abegukanye ibihembo wakozwe n’abanyamakuru ba Kiss Fm; Antoinette Niyongira, Arthur Nkusi, Luwano Tosh [Uncle Austin], Sandrine Isheja, Bagwire Keza Joanna [Miss Heritage 2015] na Cyuzuzo Jean d’Arc. Producer Made Beat yegukanye igihembo cya ‘Best Summer Producer’ mu bihembo bya Kiss Summer 2019. MadeBeat  wari amaze iminsi yigaruriye isoko ry’umuziki nyarwanda; yarambitse ibiganza ku ndirimbo nka “Kungola”, “Katerina”, “Abana babi”, “Kontwari” n’izindi.

MadeBeat yahigitse Producer Clement Ishimwe Karake wa Kina Music, Lick Lick washinze MoMusic na Press One Entertainment, Danny Beat ndetse na Producer Knoxbeat. Umuhanzi Amalon wahoze muri 1K Entertainment yegukanye igihembo cya ‘New Summer Artist 2019. Ni umuhanzi wakunzwe mu ndirimbo nka “Yambi” yamwaguriye igikundiro, “Byakubaho” nindi yitwa impanga. Muri iki cyicico cy’umuhanzi mushya ‘Best New Summer’ wigaragaje muri iyi mpeshyi ya 2019, Amalon yahigitse Kevin Skaa, Sunny na Nel Ngabo wo muri Kina Music. 

Umuhanzi Safi Madiba icyo gihe wabarizwaga  muri ‘Label’ ya The Mane yegukanye igihembo cya ‘Best Summer Song’ abicyesha indirimbo ye “Kontwari”. Muri iki cyiciro cy’indirimbo y’impeshyi ya 2019, indirimbo ya Safi yahigitse “Twifunze” y’umuhanzi Sintex, “Abana babi” ya Danny Vumbi na ‘All Night’ ya Meddy. Umuhanzi Itahiwacu Bruce [Bruce Melodie yegukanye igihembo cya ‘Best Summer Artist’. Yarushije amanota The Ben, Meddy, Charly na Nina na Nsengiyumva uzwi nka Igisupusupu, kuri ubu akurikiranyweho ibyaha birimo gufata umwana ku ngufu.

Mu cyiciro cya Producer w’impeshyi hifashishijwe akanama nkemurampaka ndetse n’amajwi y’abatoye. Ni mu gihe mu bindi byiciro bitatu hashingiwe ku majwi buri muhanzi yagize. Ku nshuro ya gatatu umwaka ushize wa 2020 ibi bihembo nta nkomyi yabayemo ahubwo hongewemo ikiciro gishya cya “ Lifetime Achievement Award “ Mu kiciro  gihatanirwa n’indirimbo zashyuhije abakunzi b’umuziki mu gihe cy’impeshyi ya 2020, harimo Igare ya Mico The Best, Ntiza ya Mr Kagame na Bruce Melodie, Saa Moya ya Bruce Melodie, Ubushyuhe ya DJ Pius na Bruce Melodie na “Do Me”ya Marina na Queen Cha.

Igare ya Mico The Best ni yo yaje gutorwa nk’indirimbo yakunzwe cyane mu mpeshyi ya 2020, iki kikaba ari nacyo gihembo cya mbere uyu muhanzi yegukanye mu muziki kuva yatangira kuwukora. Mu cyiciro cy’abahanzi bakizamuka harimo; B-Threy, Juno Kizigenza, Kevin Kade, Ariel Wayz na Calvin Mbanda. Igihembo cyaje kwegukanwa na Kevin Kade wigiye umuziki mu ishuri ryo ku Nyundo risigaye riri I Muhanga mu majyepfo y’u Rwanda.

Mu cyiciro cy’umuhanzi w’impeshyi ya 2020 harimo; The Ben, King James, Bruce Melodie, Platini na Nel Ngabo. Igihembo cyegukanywe na Bruce Melodie wumvikanye mu ndirimbo eshatu muri eshanu zari zihataniye igihembo cy’indirimbo y’impeshyi, akaba ari n’igihembo yisubije kuko umwaka ushize ni we wari wacyegukanye.

Icyiciro cya nyuma ni icy’abatunganya indirimbo(Priducers), abahatanye ni; Element, Madebeats, Knoxbeat, Clement na Davydenko. Madebeats ni we waje kwegukana iki gihembo. Igihembo cya Lifetime Achievement Award cyahawe umuntu wagize uruhare rukomeye mu gushyigikira no guteza imbere umuziki nyarwanda. Iki gihembo cyashyikirijwe DJ Bob.

Umwanditsi:Danny Rurema