Mu burasirazuba bwa Repubulika Iharanira Demokarasi ya Congo imirwano ikomeje guca ibintu hagati y'Ingabo z'iki gihugu FARDC n'umutwe wa M23 wemeza ko uharanira uburenganzira bw'abavuga ururimi rw'ikinyarwanda bigirizwaho nkana na Leta.
Mu mirwano imaze amezi menshi yaraciye ibintu muri Teritwari zirimo, Masisi, Rutshuru, na Nyiragongo, M23 yigaruriye ibice bitandukanye, nubwo FARDC yifashishije imitwe itandukanye irimo Wazalendo, FDLR, ingabo za SADC ndetse n'ingabo z'Abarundi.
Magingo aya biremezwa ko umusirikare umwe wa FARDC yishwe n'igisasu kimuturikanye mu gace ka Sake kari mu nkero z'umugi wa Goma ukaba n'Umurwa Mukuru w'intara ya Kivu n'Amajyaruguru. Ibi bibaye mu gihe muri Goma naho hakomeje kugwa ibisasu mu minsi itandukanye nubwo hatazwi ubirasa.
Agace ka Sake, ka kaba gakomeje kuba isibaniro ry'urugamba, aho impande zose zirwanira ku kagenzura. Amakuru akaba avuga ko Sake iri mu maboko ya M23, ariko izindi mpande zirabihakana zikavuga ko FARDC ariyo ikagenzura. Mu by'ukuri ntibizwi neza ugenzura uyu mugi.
Ku rundi ruhande, ku munsi w'ejo, imirwano yashyamiranyije impande zombi, amakuru aravuga ko yasize M23 yigaruriye imidugudu ya Kabase na Ndumba iherereye muri Gurupoma ya Mupfunyi Shanga.
