Hehe no kugaruka mu kibuga vuba! Imvune Neymar Jr yagize iteye ubwoba

Hehe no kugaruka mu kibuga vuba! Imvune Neymar Jr yagize iteye ubwoba

 Nov 29, 2021 - 09:32

Neymar Jr yavunikiye mu mukino PSG yatsinzemo Sainte-Etienne.

Mu mukino PSG yaraye itsinzemo Saint-Etienne nibwo Neymar yagize imvune ikomeye cyane ndetse ashobora kumara igihe kirere adakina.

Ibitego bibiri bya Marquinhos n’ikindi cya Angel Di Maria ni byo byafashje PSG kubona amanota atatu yo ku Cyumweru, yatumye igira amanota 40 mu mikino 15, irusha 12 Rennes ya kabiri.

Gusa, icyagarutsweho cyane kuri uyu mukino ni imvune ikomeye y’Umunya-Brésil Neymar ushobora kumara igihe kirekire adakina.

Neymar Jr yavunwe na Yvann Macon wa Saint-Etienne(Net-photo)

Neymar yavunitse ahagana mu kabombambari nyuma yo guserebekwa n’umukinnyi wa Saint-Etienne witwa Yvann Macon ku munota wa 85'.

Abakinnyi ba PSG bagaragaraga nk’abafite impungenge kuri iyi mvune mu gihe abaganga b’ikipe bihutiye kujya mu kibuga kugira ngo bite kuri uyu mukinnyi.

Nyuma yo kuva mu kibuga ari ku ngobyi, Neymar yagiye ku mbuga nkoranyamabaga yandika ko yizeye ko azagaruka mu kibuga ameze neza.

Ati “Ku bw’amahirwe make, izi mvune ziri mu bigize ubuzima bw’umukinnyi. Bisaba kuzamura umutwe ugakomeza kureba ibiri imbere. Nzagaruka meze neza kandi mfite imbaraga.”

Umutoza wa PSG, Mauricio Pochettino, yabwiye abanyamakuru nyuma y’umukino ko kugeza ubwo yaganiraga na bo ko “ntacyo kuvuga gihari”.

Ati “Yababaye mu kabombambari. Ejo, azakorerwa ibizamini bizatuma tumenya bike ku mvune ye.”

Neymar Jr agiye kumara igihe kinini adakina(Net-photo)

Bitewe n’uburyo imvune igaragara amakuru akomeje gusohoka avuga ko iyi mvune ya Neymar Jr izatuma amara igihe kinini adakina ariko ibizamini by'abaganga nibyo biza kubyemeza neza.

Uyu mukinnyi w’imyaka 29, ashobora kandi kubagwa, byatuma ageza mu ntangiriro z’umwaka utaha akiri hanze y’ikibuga, ariko hakenewe ko anyuzwa mu cyuma mbere yo kwemeza uko imvune ye izavurwa.