Raporo y'Ishami ry'Umuryango w'Abibumbye rishinzwe ubuzima ku Isi (WHO) iratangaza ko mu Ukuboza 2023, abasaga 10,000 bishwe na Covid-19 hirya no ku Isi. Iki kigo cy’ubuzima cyavuze ko abinjira mu bitaro muri uku kwezi, bazamutseho 42% mu bihugu bigera kuri 50, cyane cyane mu Burayi no muri Amerika.
Iyi raporo kandi, ivuga ko habayeho kwiyongera ku kigero cya 62% mu ishami ry’ubuvuzi ryita kubakeneye ubuvuzi bwihurirwa, ugereranyije no mu Gushyingo. Umuyobozi mukuru wa OMS, Tedros Adhanom Ghebreyesus, yatangarije abanyamakuru ati: "N'ubwo abantu 10,000 bapfa ku kwezi bari munsi y’ikigereranyo cy’icyorezo, uru rwego rw’impfu zishobora kwirindwa ntibibeho."
Iyi mibare iri gutangazwa, mu gihe ubwoko bushya bwa covid bwiswe "JN.1 variant" bukomeje gukwira ku Isi yose. Tedros yunzemo ko nubwo iyi mibare iri kuzamuka mu Burayi no muri Amerika, gusa ko no mu bindi bihugu naho imibare yiyongera umunsi ku munsi.
Uyu muyobozi, akaba yarasabye Leta z'Ibihugu kuba maso bagatanga ubuvuzi bw'ibanze kubanduye iki cyorezo. Ati " Turakomeza guhamagarira abantu gukingirwa, kwipimisha, kwambara udupfukamunwa aho bikenewe ndetse no guhana intera igihe abantu bari ahantu hafunganye." Muri Gicurasi 2023 OMS ikaba ari bwo yari yavuze ko Covid-19 yarangiye.
