Abasore ba Carlo Ancelotti baherutse gukorera ibitangaza i Santiago Bernabeu basezerera Manchester City muri 1/2 cya UEFA Champions league ku giteranyo cy'ibitego 6-5, bituma bagera ku mukino wa nyuma aho bazahura na Liverpool.
Mu mukino wa nyuma uzabera i Paris tariki 28 Gicurasi si abakunzi ba Real Madrid gusa bazishima mu gihe iyi kipe yaba itsinze Liverpool, ahubwo n'ikipe ya Chelsea izaba iri mu bicu kuko izaba igiye kwakira agatubutse.
Ibi byose bizaterwa n'ibiri mu masezerano ya Eden Hazard wavuye muri Chelsea mu 2019 akerekeza muri iyi kipe ya Real Madrid ahagaze akayabo ka miliyoni 130 z'amapawundi.
Chelsea izahabwa agatubutse mu gihe Real Madrid ya Hazard yatwara Champions league(Image:Rex)
Ku ntangiriro Real Madrid yishyuye miliyoni 88 z'amapawundi muri Chelsea ariko bumvikana ko hari amafaranga azagenda atangwa bijyanye n'uko Real Madrid izagenda yitwara neza kandi Eden Hazard ari muri iyi kipe, bakaba bashobora kuzageza kuri izo miliyoni 130 z'amapawundi.
N'ubwo bigaragara ko Eden hazard ntacyo yamariye Real Madrid ahanini bitewe n'imvune, ariko Chelsea yo yamaze kurya miliyoni 20 z'amapawundi za mbere ubwo Real Madrid yatwaraga La liga mu 2020.
Si amafaranga ya La liga gusa Chelsea yashyize mu masezerano ya Eden Hazard kuko yashyizemo n'ingingo ivuga ko bahabwa andi mafaranga mu gihe Real Madrid yaba itwaranye na Eden Hazard UEFA Champions league.
N'ubwo Hazard yakinnye imikino itatu gusa muri Champions league, uyu mugabo nawe azahabwa umudari bagenzi be nibaramuka batsinze Liverpool. Ibi byatuma Chelsea nayo ihabwa ayo mafaranga n'ubwo ingano yayo ubu itarajya ahagaragara.
Eden Hazard yavuye muri Chelsea ari umwe mu bakinnyi bameze neza ku isi ariko ageze muri Real Madrid yokamwe n'imvune, ndetse kugaruka ameze neza nabyo biranga.
Amakuru akomeza kuvuga ko isaha n'isaha ashobora kuva muri Real Madrid, iyi kipe ikemera kumutanga ku mafaranga make kuko yamaze kwemera ko yayihombeye.
