Nk’uko byatangajwe n’ibinyamakuru bitandukanye byo muri Leta Zunze Ubumwe za Amerika, kuri uwo munsi wa 8 Nyakanga, imodoka ebyiri zari ziparitse hafi y’ahaberaga imyitozo (dance rehearsal) bivugwa ko ari iz’ababyinnyi ba Beyoncé, zatewe n’abajura batamenyekanye.
Ibyibwe birimo za “hard drives” bivugwa ko zari zirimo ibintu by’agaciro kanini: indirimbo nshya za Beyoncé zitarasohoka, amashusho y’imyiteguro y’ibitaramo, porogaramu y’ibikorwa bye bya vuba ndetse n’andi makuru bwite y’akazi.
Amakuru yizewe avuga ko kugeza ubu ibyo bikoresho bitaraboneka, ariko iperereza ryatangiye gukorwa n’inzego z’umutekano zo muri Atlanta mu rwego rwo kugerageza kumenya ababigizemo uruhare no gusubiza ibyibwe.
Abakunzi ba Beyoncé ndetse n’abakurikiranira hafi ibikorwa bye batangiye kugaragaza impungenge ku mbuga nkoranyambaga, bacyeka ko ubwo bujura bushobora gusubika cyangwa guhindura gahunda y’ibitaramo bye, cyangwa se gutuma hari ibihangano bishya bishobora kujya hanze mu buryo butemewe.
