Muri uyu mwaka w'imikino ukomeje kuba uburyohe kuri rutahizamu Karim Benzema ukinira Real Madrid, aho ubu ariwe mufaransa watsinze ibitego byinshi muri ruhago ndetse akaba yaciye kuri Thierry Henry wamenyekanye muri Arsenal.
Ibi Karim Benzema yabikoze nyuma y'uko yatsinze ibitego bibiri mu bitego bitatu ikipe ye ya Real Madrid yaraye itsinze ikipe ya Mallorca muri shampiyona ya La liga kuri uyu wa mbere.
Thierry Henry yari amaze igihe kinini ariwe mufaransa wa mbere watsinze ibitego byinshi kuko yatsinze ibitego 411, ariko ibi bitego Benzema yatsinze byatumye ahita ayobora aho afite ibitego 413.
Benzema yagaragaje ko ari rutahizamu uteye ubwoba cyane nyuma y'uko Cristiano yari amaze kuva muri Real Madrid yerekeje muri Juventus mu 2018, kuko ariwe iyi kipe igenderaho kuva icyo gihe kugeza ubu.
Uyu mufaransa uri gusaza nk'umuvinyo, muri uyu mwaka w'imikino amaze gutsinda ibitego 22 ndetse akaba yaranatanze imipira 11 yavuyemo ibitego.
Ku myaka 34, Karim Benzema yakuyeho aka gahigo ka Thierry Henry mu gihe yamaze igihe kinini adakina imikino y'ikipe y'igihugu kuko yari yarahagaritswe. Aha abenshi batekereza ko iyo aba ahamagarwa aba yaramuciyeho kera.
Karim Benzema yageze muri Real Madrid mu 2009 ubwo yari avuye mu ikipe ya Lyon yo mu Bufaransa, akaba yaraguzwe miliyoni 30 z'amapawundi. Uyu mugabo yatwayemo ibikombe birimo La liga eshatu, champions league enye, n'ibindi bikombe.
Karim Benzema yakuyeho agahigo ka Thierry Henry(Net-photo)
Benzema yageze muri Real Madrid mu 2009(Net-photo)
