Umuhanzi wo muri Nigeria David Adeleke uzwi nka Davido akomeje gushyamirana na Sophia Momodu umugore babyaranye umwana w'umukobwa bise Imade, aho bari gupfa ko Davido adatanga indezo ibyo nawe yihakana.
Nyuma y'uko Sophia amaze igihe agaragaza ko Davido atishyura amafaranga y'ishuri ndetse akaba atita ku mukobwa we, uyu muhanzi yahise atanga ikirego arega uyu mugore amushinja gushaka indonke yifashishije umwana.
Mu nyandiko abanyamtegeko ba Davido bashyikirije Urukiko i Lagos, bavuze ko yita ku mwana we, gusa ngo ikibazo ni Sophia utanyurwa, akumva ko buri gihe yahora amwaka amafaranga.Davido avuga ko yaguriye inzu uyu mugore ya miliyoni 200 z'ama-Naira, ariko arayanga avuga ko ashaka gukomeza gukodesha iya miliyoni 5.
Kuri iyi nshuro, Sophia yongeye kugaruka mu itangazamakuru agaragaza ko ibyo Davido avuga ari ibinyoma, ndetse akagaragaza ko guhera mu 2022 ubwo umubano wabo wahagararaga, uyu muhanzi atongeye gukora inshingano ze nk'umubyeyi; nko kuba yaha umwana we impano za noheli, ku mwifuriza isabukuru y'amavuko n'ibindi.
Sophia, avuga ko yamenyanye na Davido mu 2015 ari nabwo baje kubyarana Imade, icyakora agaragaza ko baje gutandukana mu 2017, bongera kwiyunga mu 2020 kugera mu 2022.
Ashimangira ko muri iyo myaka bari kumwe yamwitagaho akishyura amafaranga y'ishuri n'ibindi, nyamara ngo guhera mu 2022 bahagarika umubano wabo, nawe yahagaritse kwita ku mwana wabo.
