Roger Federer w'imyaka 41 yamaze kwemeza ko irushanwa rya Laver cup azakina mu cyumweru gitaha, rizaba ari irya nyuma akinnye nk'uwabigize umwuga.
Uyu musuwisi yanditse ku mbuga nkoranyambaga ze ati:"Birumvikana nzakomeza gukina tennis mu gihe kiri imbere ariko si muri Grand Slams cyangwa ayandi marushanwa. Uyu ni umwanzuro uryoshye ariko unashaririye, kuko nzakumbura buri kimwe amarushanwa yampaye. Ariko icyarimwe hari na byinshi byo kwishimira."
Federer ahagaritse uyu mukino atwaye ibikombe 20 bya Grand Slams, akaba ari uwa gatatu mu batwaye byinshi, nyuma ya Rafael Nadal(Aracyakina) watwaye 22, na Noval Djokovic(Aracyakina) watwaye 21.
Uyu mugabo ntiyigeze akina irushanwa iryo ariryo ryose nyuma yo kubagwa imvune y'ivi, nyuma yo kuviramo muri ¼ muri Wimbledon yo mu mwaka ushize.
Mbere y'uko atangaza ibi kuri uyu wa Kane, abakunzi ba tennis bari biteze uyu mukinnyi muri Swiss indoors ibera iwabo mu Busuwisi, ndetse byari byitezwe ko yagaragara no muri Wimbledon mu mwaka utaha.
Roger Federer yatangaje gusezera kwe mu mukino wa Tennis(Net-photo)
