Magingo aya amatora yo muri Repubulika Iharanira Demokarasi Congo yabaye ku wa 20 Ukuboza 2023 n'indi minsi yakurikiye kugera hafi 24 Ukuboza, komisiyo y'amatora CENI iratangaza ko Perezida ucyuye igihe Felix Tshisekedi ari we uri kuza imbere.
Mu ibarura ryakozwe kuri iki Cyumweru tariki ya 24 Ukuboza 2023 mu bice bya Makanza, Isiro Ville, Bunia, Wamba, Bikoro na Momba, niho bigaragara ko Tshisekedi ari imbere.
Mu majwi arenga miliyoni imwe yamaze kubarurwa, yerekanye ko Tshisekedi uri gushaka manda ya kabiri ari imbere n’amajwi 82.6%.
Perezida Tshisekedi akomeje kwereka igihandure abo bahanganye mu matora
Ku mwanya wa Kabiri akaba akurikirwa na Moïse Katumbi wiyamamaje ahagarariye ishyaka Ensemble Pour la République n’amajwi 14.3%.
Ku mwanya wa Gatatu hari Radjabho Tebabho Soborabo, imbere y’abarimo Martin Fayulu na Dénis Mukwege bari mu bahabwa amahirwe yo gutsinda ariya matora.
Nubwo bimeze gutya, abakandida batandukanye barimo Katumbi, Fayulu na Mukwege bamaze gutangaza ko batazemera ibizava muri ariya matora bahamya ko yabayemo ubujura ndetse bagasaba ko aya matora yaseswa.
Aba bakandida bakomeje kuvuga ko amatora yagenze nabi, barajya kure bakavuga ko Perezida wa CENI akwiye gufungwa. Bikaba byitezwe ko ibyavuye mu matora bikaba bizatangazwa bwa nyuma ku wa 31 Ukuboza 2023.
