Gianluigi Buffon w'imyaka 44 yamaganiye kure ibihuha bivuga ko yaba yenda kumanika inkweto, ndetse avuga ko arashyira ibitekerezo ku gikombe cy'isi cya 2026 mu gihe Ubutariyani bwaba bubuze itike yo kujya mu gikombe cy'isi cya 2022.
Buffon ari gukina mu ikipe yakiniye akiri muto ariyo Parma iri mu kiciro cya kabiri mu Butariyani nyuma y'uko avuye muri Juventus mu mpeshyi y'umwaka ushize.
Gigi Buffon aracyafite amezi 18 ku masezerano ye muri Parma, ndetse amaze kugaragara mu mikino 21 yose muri uyu mwaka w'imikino. Buffon kandi ngo ashaka kugaruka mu ikipe y'igihugu y'Ubutariyani n'ubwo atarahamagarwa kuva mu 2018.
Aganira na La Gazetta dello Sport, Buffon yagize ati:"Ubutariyani nibutajya mu gikombe cy'isi cya 2022, nshobora gukina igikurikira.
"Ntabwo byantungura kuba nkimeze neza ku myaka 48. Michael Jordan ntiyanze gukina kugeza ku myaka 50 kandi ndamwumva. Nyuma na nyuma ikibuga kirivugira."
Nyuma y'uko Ubutariyani bunaniwe kuyobora itsinda mu mikino yo gushaka itike y'igikombe cy'isi, iyi kipe ya Roberto Mancini ifite umukoro ukomeye cyane ngo irebe ko yazajya mu gikombe cy'isi cyo muri Qatar 2022.
Iyi kipe iherutse gutwara Euro2020 irasabwa gutsinda North Macedonia ndetse n'ikipe izatsinda hagati ya Turkey na Portugal ya Cristiano Ronaldo. Bitaba ibyo, Ubutariyani buzongera bubure mu gikombe cy'isi nk'uko byagenze mu gikombe cy'isi giheruka.
Gianluigi Buffon kandi yakoze amateka bigoye ko hari undi muzamu uzayakora. Ku wa gatandatu ikipe ya Parma yanganyije na Benevento 0-0, uyu wari umukino wa 500 kuri Buffon akinnye ntiyinjizwe igitego, ibyo mu Cyongereza bita clean sheets.
Muri iyo mikino 500 atinjijwemo igitego, imikino 92 yayikinnye muri Parma, imikino 322 yayikinnye muri Juventus, imikino 9 yari muri PSG naho imikino 77 isigaye yari mu ikipe y'igihugu y'Ubutariyani.
Gianluigi Buffon ni umwe mu bakinnyi bahiriwe no gukina umupira w'amaguru kuva yatangira gukina nk'uwabigize umwuga mu 1995. Yatwaye ibikombe bitandukanye harimo ibikombe 11 bya shampiyona, ibikombe 6 by'igihugu, igikombe cy'isi n'ibindi.
Buffon ashaka gukina kugeza ku myaka 50(Image:Soccer bible)
Buffon yatwaye igikombe cy'isi mu ikipe y'igihugu(Net-photo)
