Lionel Messi yashyize hanze ibanga ryo kwitwara neza muri uyu mwaka

Lionel Messi yashyize hanze ibanga ryo kwitwara neza muri uyu mwaka

 Sep 25, 2022 - 06:34

Rutahizamu Lionel Messi yatangaje ko ubu yumva ameze neza ndetse yongeye kuryoherwa na ruhago, bikaba biri gutuma yitwara neza muri PSG no mu ikipe y'igihugu.

Mu mpeshyi ya 2021 nibwo habaye ibyatunguye benshi mu isi ya ruhago Lionel Messi ava muri FC Barcelona yari amazemo imyaka 21, yerekeza muri PSG aho yagiye ataguzwe kuko amasezerano ye yari arangiye.

Uyu mugabo w'imyaka 35 werekeje mu Bufaransa yitezweho ibitangaza ntabwo byamworoheye, kuko umwaka w'imikino warangiye ari mu bavugirizwa induru i Parc des Princes.

Lionel Messi yabashije gutsinda ibitego 6 anatanga imipira 14 yavuyemo ibitego mu mikino 26 yakinnye muri uwo mwaka w'imikino, bitari bibi ariko bitageze ku byo abafana bari bamwitezeho ndetse bagashyiraho n'uburyo basezerewe na Real Madrid muri UEFA Champions league.

Mu mwaka wa kabiri Lionel Messi akinnye muri PSG ameze neza cyane haba muri iyi kipe ndetse no mu ikipe y'igihugu, dore ko habura ibyumweru bike akaba ayoboye ikipe y'igihugu ya Argentine mu gikombe cy'isi kizabera muri Qatar kizatangira mu Ugushyingo.

Mu mikino 11 Messi amaze gukina muri Ligue 1 y'uyu mwaka, amaze gutsindamo ibitego 6 ndetse anatangamo imipira 8 kuri bagenzi be yavuyemo ibitego.

Ibitego bibiri yatsinze ubwo ikipe y'igihugu ya Argentine yakinaga na Honduras mu rukerera rwo kuri uyu wa Gatandatu, byatumye agira ibitego 88 mu mikino 163 amaze gukinira iyi kipe y'igihugu.

Messi ameze neza muri PSG no mu ikipe y'igihugu(Image:AFP)

Nyuma yo gutsinda ibi bitego nibwo Lionel Messi yatangaje ko mu Bufaransa ari kumva ameze neza cyane kurenza mu mwaka ushize, bikaba ari nabyo biri gutuma yitwara neza kurushaho.

Messi yagize ati:"Ndumva meze neza, ndi kwiyumva bitandukanye no mu mwaka ushize. Nari mbizi ko bigiye kuba gutya. 

"Merewe neza cyane mu ikipe, mu rwambariro, mu bo dukinana, ndetse no mu mukino.

"Nongeye kumva meze neza cyane, nongeye kuryoherwa na ruhago."

Mu Bufaransa ikipe ya PSG niyo iyoboye urutonde rwa shampiyona aho irusha Marseille ya kabiri amanota abiri, ndetse iyi kipe yatsinze imikino ibiri yayo muri UEFA Champions league.

Ikipe y'igihugu ya Argentine izagaruka mu kibuga ku wa Gatatu ikina umukino wa gicuti na Jamaica, bakaba bazagaruka mu ikipe y'igihugu mu kwa 11 bagiye mu gikombe cy'isi.

Mu gikombe cy'isi, ikipe y'igihugu ya Argentine izaba iri mu itsinda C ririmo ikipe y'igihugu ya Poland, Mexico n'iya Saudi Arabia.