Minaj yavuze ko mu 2015 ubwo Jay-Z yatangizaga Tidal, ari umwe mu bahanzi ba mbere bahawe imigabane muri iyo kompanyi, aho yahawe 3% y’ubufatanyabikorwa. Icyo gihe iyo migabane yari ifite agaciro ka miliyoni 56 z’amadolari. Nyamara mu mwaka wa 2021 ubwo Tidal yagurishwaga na Jay-Z ku kiguzi cya miliyoni 302 z’amadolari, Nicki yavuze ko yabwiwe ko azabona miliyoni imwe gusa, aho kuba miliyoni 9 zari zikwiye nk’uko bigaragara mu mibare y’amasezerano.
Abinyujije kuri X, Nicki Minaj yanditse ko nyuma yo gusuzuma dosiye, yasanze amafaranga yose yakabaye yishyurwa ari hagati ya miliyoni 100 na 200 z’amadolari, aboneraho gusaba Jay-Z kumwegera kugira ngo barangize icyo kibazo.
Nubwo yagaragaje ko atishimiye uko ibintu byagenze, Minaj yavuze ko agikunda kandi yubaha Jay-Z, akamushyira mu bahanzi be b’icyitegererezo. Yatangaje kandi ko niyishyurwa ayo mafaranga, azayakoresha mu gufasha abafana be binyuze mu muryango we wita ku burezi Student Of The Game, aho azishyurira bamwe amafaranga y’ishuri.
Iyi mvugo ya Nicki Minaj ikomeje gukurura impaka ndende mu itangazamakuru no ku mbuga nkoranyambaga, aho benshi bibaza niba Jay-Z azagira icyo atangaza cyangwa niba hari indi ntambwe izakurikira.
Nicki Minaj arashinja Jay-Z kumwambura amafaranga y'imigabane ye
Nicki Minaj avuga ko ayari miliyoni 9 z'amadorari ubu amaze kuba nka miliyoni hagati ya 100 na 200
