Ibintu bikomeje kuba inshoberamaganga mu mirwano iri mu burasirazuba bwa Repubulika Iharanira Demokarasi ya Congo hagati y'Ingabo z'iki gihugu FARDC ndetse n'umutwe witwaje intwaro wa M23.
Kuri ubu, amakuru agarukwaho mu bitangazamakuru byo muri kano Karere, ni uko umutwe wa M23 umaze iminsi wigarurira ibice bitandukanye muri Teritwari za Rutshuru, Masisi na Nyiragongo. Nko mu Cyumweru cyashize, ingabo za Leta zemeje ko M23 yafashe agace ka Nyanzale.
Magingo aya, Ihuriro rya sosiyete sivile zo muri Teritwari zigize intara ya Kivu ya Ruguru, riranenga gusubira inyuma kw'ingabo za DR-Congo zikareka M23 igafata ibice bitandukanye nta mirwano ibaye.
Mu ntangiriro z'iki Cyumweru, M23 yafashe ibice bitandukanye byo muri Teritwari ya Rutshuru birimo agace ka Vitshumbi Kari ku nkengero z'ikiyaga cya Rwicanzige (Lac Edouard) hamwe n'agace ka Rwindi nk'uko BBC ibitangaza.
Kuri uyu wa Gatatu kandi, amakuru aravuga ko M23 yigaruriye uduce twa Mpeti muri Walikare na Kamandi muri Teritwari ya Lubero. M23 ikaba yarafashe ibi bice nyuma y'imirwano yabahuje n'abarwanyi ba NDC.
