Mu gihe Abanye-Congo Kinshasa bategereje kumva uwegukanye amatora y'umukuru w'Igihugu yabaye ku wa 20 Ukuboza 2023, impaka zikomeje kuba nyinshi bamwe bemeza ko bibwe. Kugera ubu ishyaka rya Moïse Katumbi ritavuga rumwe n'irya Tshisekedi riremeza ko ryegukanye amatora.
Kuri ubu, Komisiyo y'amatora aho muri Repubulika Iharanira Demokarasi Congo CENI, ikomeje gutangaza amajwi y'ibanze, aho yerekana ko Perezida ucyuye igihe Felex Antoine Tshisekedi ari we uri kuza imbere aho akomeje gukubitira aharebera inzega abo bari bahanganye.
Bwana Christian Mwamba uhagarariye Moïse Katumbi mu Ntara ya Haut-Katanga, ubwo yari i Lubumbashi, akaba yatangaje ko umukandida wabo ari we watowe n'abaturage ba DRC ngo ayoboye iki gihugu nka Perezida wacyo.
Moïse Katumbi wahatanye mu matora y'umukuru w'Igihugu muri DRC
Kuri Christian, yahamije ko Komisiyo y'amatora CENI, ibyo irimo kuri ubu, ari ugushaka guhuguza amajwi Katumbi watowe n'abaturage. Uyu atangaje ibi, mu gihe n'ubundi bosi we na we yavuze ko amatora akwiye guseswa, kuko ngo harimo ubujura bukabije.
Magingo aya, amajwi amaze kubarurwa, arerekana ko mu majwi miliyoni 62. 7 amaze kubarwa, arerekana ko Tshisekedi akomeje kubereka igihandure, aho kuri ubu afite amajwi 80.3 % agakurukirwa na Moïse Katumbi ufite amajwi 15.8%.
Ku mwanya wa Gatatu mu bari kuza imbere mu majwi, hari Martin Fayulu ufite amajwi 1.8%. Ni mu gihe byari byitezwe ko Abakongomani barenga miliyoni 40 ari bo bari gutora. Ibyavuye mu matora bikaba bizamenyekana ku wa 31 Ukuboza 2023.
