Donald Trump yateje impaka ku mbuga nkoranyambaga nyuma yo gusohora amafoto yakozwe n'ubwenge buhimbano (Artificial intelligence) agaragaza ko Taylor Swift amushyigikiye mu bikorwa by'amatora.
Mu butumwa Trump yashyize ku rubuga rwe Truth Social, yagaragaje amafoto ariho Taylor Swift yanditseho ati " Taylor ashaka ko utora Trump," Trump nawe ahita yandika ati "Ndabyemeye".
Andi mafoto Trump yasohoye, yerekana abafana ba Taylor Swift bambaye imyenda yanditseho izina Trump, ibikomeje kurakaza abafana ba Taylor Swift.
Icyakora kugera magingo aya, abashinzwe ibikorwa bya Taylor Swift ntacyo baratangaza kuri ayo mafoto ya Donald Trump.
Nubwo Trump yasohoye amafoto agaragaza ko Taylor Swift amushyigikiye mu matora y'Umukuru w'Igihugu muri Amerika, ariko uyu muhanzi ntabwo yigeze avuga ko amushyigikiye.
Ikindi kandi, mu 2020 Taylor Swift ntabwo yashyigikiye Trump, kuko yatoye Joe Biden, ndetse biratekerezwa ko uyu mwaka nabwo ashyigikiye Kamala Harris uzahangana na Trump ku wa 05 Ugushyingo 2024.
Trump yasohoye amafoto agaragaza ko Taylor Swift amushyigikiye mu matora
