Abafana ba Atletico Madrid batangiye kugaragaza ibitekerezo byabo babinyujije ku mbuga nkoranyambaga zirimo Twitter basaba ikipe yabo kudasinyisha rutahizamu wa Manchester United Cristiano Ronaldo.
Ronaldo w'imyaka 37, arashaka kuva muri United nyuma y'umwaka umwe w'imikino aho yari yayigarutsemo nyuma yimyaka 12 ayivuyemo. Cristiano Ronaldo arifuza ikipe yamuha umwanya wo gukina UEFA Champions League, mu gihe Manchester United izakina Europa League.
Abafana ba Atletico ntibashaka Cristiano Ronaldo
Amakipe menshi akomeye i Burayi yagize ubwoba bwo gusinyisha uyu mugabo, ariko bigaragara ko bishoboka ko yakwakirwa muri Atletico Madrid mukeba wa Real Madrid yakozemo ibigwi.
Gusa abafana batari bake ba Atletico Madrid ntibahwemye kugaragaza neza ku mbuga nkoranyambaga ko badashaka ko iyi kipe isinyisha Ronaldo.
Bakoresheje hashtag "Contra CR7" (kurwanya CR7) kuri Twitter, abafana b'iyi kipe bakomeje kwandika amagambo anyuranye ndetse bamwe bemeza ko bazahagarika kuba abanyamuryango b'iyi kipe nibaramuka basinyishije uwahoze ari umukinnyi wa Real Madrid.
Umwe mu bafana yanditse kuri Twitter ati:"Niba uyu (Ronaldo) aje kuri Atletico yanjye, nzahagarika kuba umunyamuryango. Ntabwo turi ubuhungiro bw'indembe."
Cristiano Ronaldo yagiye ababaza cyane Atletico Madrid akiri muri Real Madrid
Bivugwa ko Jorge Mendes ushinzwe inyungu za Cristiano Ronaldo amaze iminsi aganira n'ubuyobozi bwa Atletico Madrid, n'ubwo ikipe ya Manchester United itaremera ko izarekura uyu munya-Portugal.
