Itangazwa ry'itariki y'amatora ya Perezida wa Repubulika mu Rwanda ndetse n'ay'Abadepite, ryasohotse mu Iteka rya Perezida N° 077/01 ryagiye hanze kuri uyu wa Mbere tariki ya 11 Ukuboza 2023.
Aya matora, akazaba ari ku nshuro ya Mbere mu Rwanda abaye, aho aya Perezida wa Repubulika yahujwe n'ay'Abadepite. Akaba yarahujwe mu buryo bwo kwirinda gutakaza amafaranga menshi.
Amatora ya Perezida wa Repubulika n'ay'Abadepite 53 batorerwa kuri lisiti y'amazina ndakuka y'abakandida hatangwa n'imitwe ya politike cyangwa biyamamaza ku giti cyabo, azaba tariki ya 15 Nyakanga 2024. Mu gihe ku Banyarwanda batuye mu Mahanga bazatora ku wa 14 Nyakanga 2024.
Kuri tariki ya 16 Nyakanga, ni amatora ku badepite mu nzego zihariye. Ingingo ya 4 muri iryo teka, ivuga ko igikorwa cyo kwiyamamaza kw'abakandida mu itorwa rya Perezida wa Repubulika no mu itora ry'abadepite, kizatangira ku wa 22 Kamena 2024, aho kwiyamamariza bibera.
Kugera magingo aya, Perezida Paul Kagame yatangaje ko yiteguye kuzongera guhatana mu matora ya Perezida. Ibi bikaba bivuze ko Ishyaka aturukamo rya FPR Inkotanyi, ari na we uzaba urihagarariye.
Mu mashyaka ya Politike 11 yemewe mu Rwanda arimo; Democratic Party (PDI), Democratic Green Party iyoborwa Dr Frank Habineza ndetse n'anandi, akaba yitezwe muyazahatana niba atazifatanya n'abandi kugira ngo bashyigikirane.
Amatora yo mu 2024, akazaba aje akurikira ayabaye mu 2017, aho Perezida Kagame yari yayegukanye. Akaba kandi yari yanegukanye manda ebyiri zabanje zo kuva mu 2003 kugera mu 2010 ndetse no kugeza mu 2017.
