Mu gitondo cyo kuri uyu wa 17 Mutarama 2024, umutwe witwaje intwaro wa M23 ukorera mu burasirazuba bwa Repubulika Iharanira Demokarasi ya Congo wemeje ko Ingabo za Leta FARDC zabagabyeho ibitero simusiga bihitana abakomando bayo babiri.
Mu itangazo ryashyizweho umukono n'umuvugizi w'uyu mutwe Laurence Kanyuka, yemeje ko abakomando babo bari mu birindiro bya Kitchanga basutsweho ibibombe, nubwo atatangaje amazina yabo.
Yagize ati " Leta ya Kinshasa yongeye kurenga ku ihangarikwa ry'imirwano kuri uyu wa 16 Mutarama 2024 igaba ibitero ku ngabo zacu ziri ku rugamba, yica babiri mu bakomando bacu."
Nubwo Kanyuka atavuze amazina yabo, ariko biremezwa ko harimo Colonel Castro Elise Mberabagabo wari ushinzwe ubutasi muri uyu mutwe.
M23 yemeje ko abakomando bayo barashwe
Andi makuru aremeza ko Umujyanama mukuru wa General Sultani Makenga, Colonel Erasto Bahati yakomerekeye muri iki gitero cyagabwe na dorone karahabutaka zavuye mu Bushinwa zikoreshwa n'abarwanyi ba Wagner Group yo mu Burusiya.
Mu itangazo rya M23 kandi, bavuze ko ibikorwa FARDC yakoze, ntakabuza igiye kubyishyurira ikiguzi gihambaye. Ati " M23 yumvishe ubutumwa bwoherejwe na Leta ya Kinshasa kandi irasubiza muri ubwo buryo."
Hagati aho, ibitangazamakuru bikaba bikomeje kwandika ko Col.Mberabagabo wishwe, atari umuntu usanzwe, kuko ngo yari umuherwe kandi afite imitungo mu bihugu birimo Ubwongereza, Uganda na DRC. Ikindi kandi, biravugwa ko umugore we yari Umwongerezakazi.
M23 yarahiriye guhorera abasikare bakuru bayo barashwe
