Ni imirwano yabaye none tariki ya 24 Gashyantare 2024, aho umutwe wa M23 washinje ingabo za Repubulika Iharanira Demokarasi ya Congo FARDC n'abo bafatanya mu ntambara barimo: FDLR, Ingabo z'Uburundi, iza SADC, abacanshuro ndetse n'abarwanyi ba Wazalendo gutangiza imirwano.
Mu itangazo ryashyizweho umukono na Lawrence Kanyuka umuvugizi wa M23 muri politike akabicisha ku rubuga rwa X, yavuze ko FARDC yabyutse irasa i Sake no mu nkengero zaho bakoresheje intwaro zirasa kure n'izindi ziremereye.
Kanyuka yunzemo ko ibyo bitero biri kwibasira abasivile, ahamya ko AFC-M23 ikomeje kurinda abaturage kuko ariyo nzira aba barwanyi bakoresha mu rwego rwo kwirwanaho. Ku rundi ruhande, amakuru avuga ko M23 yarangije kwihuza neza na AFC kugira ngo banoze neza ibiganiro bya politike na Leta ya DRC.
Imirwano yo kuri uyu wa Gatandatu, ije yungikanye n'indi nkuru yiriweho kuri uyu wa Gatanu ivuga ko M23 yari yacitsemo ibice bitewe n'intambara imaze kubakomerana, gusa Lawrence Kanyuka yanyomoje aya makuru avuga ko ibyo byakwirakwijwe n'uruhande rwa Leta ya Kinshasa.
