Amakuru ava i Madrid aravuga ko ikipe ya Real Madrid yaba yatangiye urugendo rwo gushaka rutahizamu wa Borussia Dortmund Erling Haaland.
Mu gihe ibyo gusinyisha Kylian Mbappe bisa n'ibyarangiye, iyi kipe ishaka kumuzanira rimwe na Erling Haaland mu mpeshyi ya 2022 ubundi ikaba yakongera gukora ikipe y'amazina byibushye muri ruhago.
Byitezwe cyane ko mu mpeshyi ya 2022 Erling Haaland azava muri Borussia Dortmund kuko ashakwa n'amakipe akomeye i Burayi hafi ya yose, gusa ntihazwi ikipe azerekezamo.
Ikinyamakuru cyandikira muri Espagne kitwa Libertad Digital cyiratangaza inkuru ivuga ko Real Madrid yaba yamaze kwegera umu-agent wa Haaland witwa Mino Raiola mu rwego rwo kureba ko iyi kipe yakwegukana uyu musore w'imyaka 21.
Ubuyobozi bwa Real Madrid bufite ikizere ko iyi kipe ariyo mahitamo ya Haaland mu gihe yaba afashe umwanzuro wo kuva muri Borussia Dortmund.
Gusa n'ubwo bimeze gutya, amakipe yo mu Bwongereza ayobowe na Manchester City akunze kuvugwa ko yifuza cyane uyu musore ukomeje kubica bigacika kubera ibitego byinshi atsinda.
Manchester City ya Pep Guardiola ikomeje gukina imikino yayo igiye itandukanye nta mwataka ifite, kandi papa wa Haaland witwa Alf-Inge yakiniye iyi kipe yo mu mujyi wa Manchester. Icyo kikaba kimwe mu bishobora gufasha iyi kipe kubona Erling Haaland.
Imibare ya Erling Haaland muri Borussia Dortmund ntisanzwe kuko uyu musore yabashije gutsinda ibitego 80 mu mikino 79 yayikiniye kuva yayigeramo, akaba aribyo bituma yifuzwa n'amakipe akomeye ku isi.
Bikomeje kuvugwa ko kandi Real Madrid yamaze kumvikana na Kylian Mbappe ko azayijyamo asoje amasezerano ye muri PSG mu kwezi kwa gatandatu.
Real Madrid ishaka kujyanira rimwe aba basore bakomeje gufatwa nk'abasimbura ba Lionel Messi na Cristiano Ronaldo bamaze iminsi bayoboye ruhago y'isi ariko bakaba batarigeze bahurira mu ikipe imwe.
Erling Haaland arifuzwa cyane na Real Madrid(Image:Marca)
Real Madrid irashaka kujyanira rimwe Haaland na Mbappe(Net-photo)
