CHOGM: Mico The Best yashimishije abanya Biryogo naho Kenny Sol unyura inkumi z’ikimero Ku Gisimenti

CHOGM: Mico The Best yashimishije abanya Biryogo naho Kenny Sol unyura inkumi z’ikimero Ku Gisimenti

Date: Jun 21, 2022 - 10:56


Mu ijoro ryakeye tariki 20. Kamena 2022 abahanzi, aba Djs n’abanyamakuru bari babukereye i Remera ku Gisimenti muri Car free zone ndetse n’i Nyamirambo mu Biryogo mu gace kanariwe kwidagadura. Kenny Sol yatatamiye i Remera naho Mico The Best ataramira mu Biryogo.

Ku munsi wa mbere w’inama ya GHOGM irimo kubera mu Rwanda kuva ejo tariki 20 Kamena 2022 harimo haraba ibitaramo byo kwakira abashyitsi bitabiriye iyi nama mu buryo bwo kubaha ibirori mu bitaramo byiswe “Kigali’s People Festival”.

Mu ijoro ryakeye i Remera ahazwi nko ku Gisimenti niho abahanzi Kenny Sol n’itsinda rya Symphony Band bari babukereye naho mu Biryogo umunyamakuru Lucky Nizeyimana, Dj Diallo na Mico The Best nabo basusurukije benshi.

Dore uko byari byifashe i Nyamirambo.

Lucky ni we wabanje ku rubyiniro mu masaha y’umugoroba ashyushya abantu mu buryo butandukanye, acishamo akabwira abantu ko aha ari mu rugo ku ivuko.

Yageze aho ahamagara DJ Diallo bafatanya gukomeza gushimisha abari bitabiriye. Dj Diallo akigera ku rubyiniro ibintu byahindutse kuko yatangiye kuvanga imiziki itandukanye yiganjemo igezweho ya ‘Amapiano’ bituma abasore n’inkumi birekura abaceza karahava.

Mu ndirimbo uyu musore yavanze harimo “Kamwe” y’abahanzi nyarwanda batandukanye, Sawa Sawa ya Bruce Melodie na Khaligraph Jones n’izindi.

Lucky yakomeje ahamagara abasore n’inkumi bashoboye gukaraga umubyimba, hanyuma ahamagara n’Umuhanzi Mico The Best wari umuhanzi mukuru kuri iki gitaramo.

Mico The Best yaririmbye indirimbo ze zitandukanye asusurutsa benshi bitabiriye. Mico yaririmbye indirimbo zirimo ‘Miliyoneri’, ‘Umunamba’ , ‘Umutaka’, ‘Igare’, ‘Indembo’ n’izindi ari nako abasaba kuzimya amatara bagacana telefoni zabo kugirango iki gitaramo kizasigare mu mitwe y’abakirebye.

N’ubwo mu Biryogo byari ibicika, i Remera ho byari ibindi bindi cyane ko batandukanye rwose kuko hamwe baba binkwera agacyayi naho ahandi barisoma, ibi bituma kwizihirwa bitandukana.

Dore uko byari byifashe i Remera.

Igitaramo cyatangijwe n’umunyamakuru aka n’umushyushyarugamba Mc Tino, yasusurukije abantu mu buryo bwe bwihariye nk’uko abamuzi bazi ko aba afite imbaraga nyishi no kusukiranya amagambo adategwa.

MC Tino adatinze yahise ahamagara DJ Ira, uri mu bakobwa bazwiho kuvanga imiziki neza mu Rwanda. Uyu mukobwa yasusurukije abantu karahava binyuze mu ndirimbo nyinshi zikunzwe muri iyi minsi.

Hakurikiyeho itsinda ry’abahanzi rya Symphony Band riri mu akunzwe cyane mu Rwanda muri iyi minsi.

Mu ndirimbo zabo nkeya baririmbye basusurukije benshi ariko umuriro urabatenguha bavaho badasoje.

Nyuma yaho gato umuriro wagarutse maze Mc Tino na Dj Ira bahamagara umuhanzi Kenny Sol.

Uwavuga ko Kenny Sol yabaye umuhanzi mwiza mu ntangiriro z’icyumeru ntiyaba abeshye, yaririmbye indirimbo “Ikinyafu” yakoranye na Bruce Melodie, Umurego, Kamwe yakoranye n’abandi bahanzi. Byageze ku ndirimbo ye “Haso” biba ibindi bindi kuko n’abashyitsi batazi Kinyarwanda bumvagamo “Hustle” maze bararirimba karahava.

Kenny Sol yavuye ku rubyiniro ubona abantu bakimushaka.

Ku Gisimenti byari ibicika.