Nubwo byemezwa ko gutwara abantu mu kirere (mu ndege) ari bwo buryo bwa mbere bwizewe bugabanya impanuka mu buryo bwose bwo gutwara abantu n'ibintu, ariko ubu bwikorezi bumaze kwirenza abaperezida benshi guhera mu myaka 84 itambutse uwa mbere apfuye.
Guhera mu 1903 indege ya mbere yaguruka mu kirere, abaperezida umunani bamaze kwicwa n'impanuka y'indege. José Félix Estigarribia Perezida wa Paraguay ari mu ba mbere bishwe n'indege.
Perezida wa Iran Ibrahim Raisi uheruka kwitaba Imana
Magingo aya, Perezida wa Iran Ibrahim Raisi akaba ari we uheruka kwitaba Imana ku wa 19 Gicurasi 2024 aguye mu mpanuka y'indege ya kajugujugu mu gace k'imisozi mu Majyaruguru y'umurwa mukuru wa Iran Tehran.
Dore Abaperezida bamaze kugwa mu mpanuka y'indege:
1. Perezida José Félix Estigarribia wa Paraguay mu 1940: Uyu mukuru w'Igihugu akaba yaratabarutse ku wa 7 Nzeri 1940 indege ye iguye mu gace ka Altos muri Paraguay.
2. Perezida Ramon Magsaysay wa Philippines mu 1957: Akaba yaratabarutse ku wa 17 Werurwe mu 1957 mu misozi ya Manunggal ho muri Philippines.
3. Perezida Samora Moisés Machel wa Mozambique mu 1986: Machel akaba yaratabarutse aguye mu mpanuka y'indege ku mupaka wa Afurika y'Epfo na Mozambique.
4. Perezida Muhammad Zia-ul-Haq wa Pakistan mu 1988: General Muhammad Zia-ul-Haq, akaba yarabaye Perezida wa Gatandatu wa Pakistan, akaba yarapfuye ku wa 17 Kanama 1988.
5. Perezida Juvénal Habyarimana, na Perezida w'u Burundi Cyprien Ntaryamira mu 1994: Aba bombi bitabye Imana ku wa 06 Mata 1994 baguye mu ndege ya Falcon 50 ku kibuga cy'indege cya Kigali i Kanombe.
6. Perezida Lech Kaczyński wa Poronye mu 2010: Uyu nawe yitabye Imana ku 10 Mata 2010 aguye i Smolensk mu Burusiya.
